Wakizungumza na waandishi wa habari wakiwa katika Hospitali ya Wilaya ya Kahama walipolazwa, wachimbaji hao walisema walikuwa katika shimo hilo kwa siku hizo huku wakila wadudu, hususan mende, pamoja na mizizi ya miti. Halikadhalika wanasema walitumia kofia zao kukinga maji yaliyokuwa yakitiririka kutoka juu ya ardhi na kunywa.
Mmoja wa wachimbaji hao, Chacha Wambura, alisema katika shimo hilo, walifukiwa sita, lakini mwenzao, Musa Spana alifariki dunia baada ya kukataa kula mizizi na kisha kupata ugonjwa wa kuhara uliosababisha kifo chake. “Tulikuwa tukitumia miti inayojengea mashimo (matimba) kama chakula sambamba na wadudu wadogowadogo na maji tulikuwa tukitumia kofia zetu kukinga maji yaliyokuwa yakitoka juu ingawa yalikuwa ni machafu.
Mwenzetu mmoja, Musa Spana alifariki dunia baada ya kukataa kutumia vitu hivyo,” alisema Wambura. Kwa mujibu wa mchimbaji huyo, waliokolewa baada ya wachimbaji wenzao waliokuwa jirani na shimo ambalo walitumbukia ambapo walipokuwa wakifanya kazi hiyo ya uchimbaji na kufika chini, wakasikia sauti za watu. Alisema shimo lao lilikuwa umbali wa meta 200 kutoka ardhini, hivyo wachimbaji wenzao walipofika chini jirani na shimo lao, walisikia sauti zao, wakarudi juu na kuwaarifu wananchi wengine.
Kwa mujibu wa Wambura, baadaye wachimbaji hao kwa kushirikiana na wananchi walianza jitihada za kuwaokoa na kufanikiwa kuifanya kazi hiyo juzi, lakini maiti ya mwenzao Spana haijaopolewa. Naye Naibu Kamishna wa Madini nchini, Ali Samaje aliwataka wachimbaji wadogo kuimarisha migodi huku wakizingatia masuala ya kiusalama zaidi, hali itakayowawezesha kufanya kazi zao kwa uhakika na kuepuka ajali.
Mganga Mfawidhi wa Hospitali ya Wilaya ya Kahama, Joseph Ngowi, alisema ameshtushwa na tukio hilo la wachimbaji kukaa kwa muda huo shimoni, na kuongeza kuwa tukio hilo linaweza kuwa ni maajabu ya nane ya dunia.
Alisema waathirika hao wapo katika hospitali hiyo chini ya usimamizi wa Kitengo cha Lishe na Saikolojia ili kuhakikisha kuwa wanarudi katika hali zao za kawaida kwa muda usiopungua siku saba.
“Hawa jamaa tunao katika hospitali yetu, na hawaoni kwa muda huu mpaka muda wa siku saba upite, kwani sehemu waliyokuwepo palikuwa ni giza, hali ambayo kwa sasa bado macho yao sio mazuri pamoja na akili zao sio nzuri,” alifafanua.
Pia alisema kutokana na kukaa shimoni kwa muda mrefu, hali zao ni dhaifu na utumbo bado haujawa vizuri kwa hiyo kwa kuwatumia wataalamu wa Idara ya Lishe kwa sasa wanawatengenezea chakula laini kama vile uji ili wapate nguvu, na wanatarajia ndani ya siku saba hali zao zitaanza kutengamaa.
Kamanda wa Polisi Mkoa wa Shinyanga, Justus Kamugisha akizungumza kwa simu alikiri kutokea kwa ajali hiyo katika mgodi wa wachimbaji wadogo wa Nyangalata na kuongeza wanaendelea na uchunguzi.
Akizungumza mjini Dar es Salaam, Meneja Uhusiano wa Wizara ya Nishati na Madini, Badra Masoud aliwataka wachimbaji wadogo kuhakikisha wanatumia vifaa vya kisasa ili kuepusha matatizo kama haya.
Badra alisema ni lazima wachimbaji hao wawe makini katika suala zima la uchimbaji kwa kuhakikisha wanatumia vifaa vya kisasa ili kujihakikishia usalama wao. “Wengi wanachimba tu bila kuwa na vifaa vyenye uhakika linapotokea tatizo kama hili inakuwa ngumu kukabiliana nalo ni vyema wakatumia vifaa salama ambavyo vitawahakikishia usalama wao,” alisema. Alisema wizara hiyo inaendelea na juhudi zake ili wafanikishe kuupata mwili wa Supana ambao upo katika machimbo hayo.
0 comments:
Post a Comment