Mahakama
Kuu Kanda ya Iringa, leo inatarajia kuendelea kusikiliza kesi ya mauaji
ya aliyekuwa Mwandishi wa Kituo cha Televisheni cha Chanel Ten, Daud
Mwangosi, inayomkabili aliyekuwa askari wa Kikosi cha Kutuliza Ghasia
(FFU), Pacificus Cleofas Simon.
Ni baada ya mashahidi wawili kutoa ushahidi katika Mahakama hiyo Alhamisi na Ijumaa wiki iliyopita mbele ya Jaji Paulo Kihwelo.
Jaji Kihwelo leo anatarajia kusikiliza ushahidi wa shahidi wa tatu katika kesi hiyo ambaye hata hivyo, hakutajwa.
Jaji huyo wiki iliyopita aliamuru upande wa utetezi kupokea
kielelezo cha gazeti la Septemba 3, mwaka 2012 kama utambuzi wa awali
ili kusaidia ushahidi wa keshi hiyo.
Jaji Kihwelo alisema kuwa kielelezo hicho ni muhimu kwa sababu
kitasaidia kutumika katika ushahidi wa kesi hiyo ya mauaji ya mwandishi
huyo.
Shahidi wa kwanza katika kesi hiyo, Said Mnunka ambaye ni Ofisa
mstaafu wa FFU, alidai kuwa hakumtambua aliyedaiwa kufanya mauaji hayo
hadi alipotazama picha kwenye gazeti.
“Sikuweza kutambua chochote kuna kitu kilitokea, lakini kama
Septemba 3, niliona gazeti ofisini kwa RPC wa Mkoa wa Iringa, Michael
Kamuhanda, ndipo nilibaini kuwa kuna kitu kilitokea jana yake (Septemba
2) baadaye ndipo tulizifuatilia kwa mtu mmoja mmoja kuanzia kwa wale
askari walionekana kwenye ile picha hadi kumbaini mtuhumiwa,” alidai
Mnunka
Naye Shahidi namba mbili katika kesi hiyo ambaye pia ni Mkuu wa
Kituo cha Polisi Wilaya (OCD) cha Mufindi mkoani Iringa, Assel
Mwampamba, alidai kuwa Septemba 1, mwaka 2012, alipigiwa simu na
aliyekuwa Kamanda wa Polisi Mkoa wa Iringa, Michael Kamuhanda, na
kumuamuru aandae kikosi kwenda Kijiji cha Nyololo kuzuia maandamano na
mkutano wa Chama cha Demokraasia na Maendeleo (Chadema).
“Siku hiyo nilitekeleza maagizo kama nilivyoagizwa na RPC kesho
(Septemba 2) tulielekea Nyololo nikiwa na kikosi changu, gari la mkoa
moja, magari mawili ya askari wa FFU kutoka mjini Dodoma,” alidai.
OCD Mwampamba aliendelea kudai kuwa walipofika Mufindi walikutana
na magari mawili ya polisi kutoka Wilaya ya Mufindi na kuelekea kwenye
eneo la tukio.
Alidai walipofika Kijiji cha Nyololo walikuta Chadema wamefunga
vinasa sauti kwa ajili ya kuanza mkutano wao na kwamba aliteremka kwenye
gari na kuongea na viongozi wa chama hicho, lakini walikaidi na
kutamka kuwa liwalo na liwe lazima wafanye mkutano wao.
Alidai kuwa aliamriwa kuzuia maandamano hayo ili kutekeleza amri ya
Serikali baada ya kutangaza kuzuia vyama vyote vya siasa visiendelee
na mikutano kutokana na zoezi la sensa ya watu na makazi.
Aliendelea kudai kuwa baada ya kuona fujo zimetulia, ndipo
waliamriwa kuingia kwenye magari kwa ajili ya kurudi kwenye kambi zao.
Hata hivyo, alidai kabla hawajaondoka, alishtukia Mwangosi ambaye
alikuwa Mwenyekiti wa Klabu ya Waandishi wa Habari Mkoa wa Iringa,
amemkamata mikono bila kujua sababu, ndipo alipoamua kupiga yowe kuomba
msaada.
Alidai wakati askari wakienda kumsaidia, alisikia mlipuko wa kishindo na kupoteza fahamu.
Alidai alipozinduka alijikuta amelazwa Hospitali ya Wilaya Mufindi
akipatiwa matibabu bila kujua kilichotokea Septemba 2, mwaka 2012.
Alidai badaye aliambiwa kuwa Mwangosi alifariki dunia. “Sikujua
mwandishi huyo alikuwa na dhumuni gani, ndiyo maana nikaamua kuomba
msaada kutoka kwa askari wenzangu ili waweze kunisaidia, ” alidai
Mwampamba.
Jaji Kihwelo aliahirisha kesi hiyo hadi leo atakapoendelea kusikiliza ushahidi huo.
Jaji Kihwelo alisema kuwa mashahidi hao wawili watahitajika mahakamani hapo kama ushahidi walioutoa haujakamilika.
Baada ya shahidi wa pili kumaliza kutoa ushahidi, Jaji Kihwelo
alisema kuwa shauri hilo limehairishwa na hakumtaja ni shahidi yupi
atatoa ushahidi leo.
Awali Wakili wa Serikali, Sunday Hyre, alidai kuwa Septemba 2,
mwaka 2012, mtuhumiwa huyo alidaiwa kumuua Mwangosi kwa kumpiga kwa
bomu kwa makusudi, lakini mtuhumiwa alikana shitaka hilo.
Alidai kuwa mauaji hayo yalitokea Septemba 2 mwaka 2012 katika
kijiji cha Nyololo wakati Chadema wanajiandaa kwa ajili ya kufanya
maandamano na mkutano mkubwa pamoja na kufungua tawi la chama.
Mtuhumiwa huyo anatetewa na Wakili Rwezaula Kaijage.
0 comments:
Post a Comment