Azam FC mmeitoa nchi kimasomaso.

MASHINDANO ya Kombe la Kagame yaliyodumu kwa takribani wiki mbili yamemalizika jana kwenye Uwanja wa Taifa Dar es Salaam huku Azam FC ikipeperusha vema bendera ya tanzania kwa kuifunga Gor Mahia ya Kenya mabao 2-0 na kutwaa ubingwa.
Azam imewatoa kimasomaso Watanzania kwa kuwa mashindano hayo yalifanyika nyumbani, huku timu ya KMKM ikitolewa katika hatua ya makundi na mabingwa mara tano wa mashindano hayo, Yanga ikitolewa katika hatua ya robo fainali (dhidi ya Azam).
Kama kombe hilo lingechukuliwa na timu nyingine ingekuwa ni aibu kwa nchi pamoja na soka la Tanzania kwa ujumla.
Timu nyingine zilizoshiriki mashindano hayo yaliyoanza kwa kuchezwa katika makundi matatu na nchi zilikotoka kwenye mabao ni Gor Mahia (Kenya), Telecom (Djibout) na Khartoum-N (Sudan).
Nyingine APR (Rwanda), Al Shandy (Sudan), LLB AFC (Burundi), Heegan FC (Somalia), Malakia (Sudan Kusini), Adama City (Ethiopia) na KCCA (Uganda).
Jambo Leo tunaipongeza Azam kwa kutwaa ubingwa huo ambapo imeweza kujiandikia historia kwa kuwa mmoja wa mabingwa wake, na kuifanya Tanzania kuheshimika katika ya timu za Afrika Mashariki na hata nje.
Kwa kutwaa ubingwa huo kwa mara ya kwanza baada ya kutolewa katika fainali dhidi ya Yanga 2012, tunaamini kuwa inaweza kuhamasisha timu nyingine za Tanzania kwamba inawezekana kutwaa ubingwa katika mashindano ya kimataifa kama zitajipanga vizuri.
Kutwaa ubingwa huo ni matunda ya uwekezaji uliofanywa na wamiliki wake kuwasajili wachezaji wenye uwezo, kuwa na benchi la ufundi lenye wataalamu wa kutosha, uongozi mzuri na kupata sapoti ya mashabiki.
Kwa kuwa mashindano hayo yako kwenye kalenda, timu nyingine zijiandae vizuri ili kuweza kushiriki katika mashindano yajayo kwa ushindani.
Tunalipongeza Baraza la Vyama vya Soka Afrika Mashariki na Kati (Cecafa) kwa kuweza kuiamini Tanzania na kuipa uenyeji na Shirikisho la Mpira wa Miguu Tanzania (TFF) kwa kuandaa na kusimamia vizuri mashindano hayo.
Mwisho wa jambo moja ni mwanzo wa jingine, Azam isibweteke kwa kutwaa ubingwa huo, ijipange kwa ajili ya kushiriki mashindano mengine yajayo ya Ligi Kuu na Kombe la Shirikisho Afrika.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.