Nakumbuka kwa miaka hiyo tulikuwa tukibandika picha ya wachezaji na timu zinazowika kwenye madftari yaliyotumika ili kuonesha mapenzi au ushabiki.
Katika miaka hiyo ni dhahiri kuwa kwa upande wa walinda mlango jina la Mwameja lilikuwa juu kutokana na uwezo wake wa kuokoa michomo, kudaka au kupangua penalti na kupanga walinzi wake vema.
Waswahili wanasema wakati ukuta, baada ya Mwameja kuachana na soka la ushindani nafasi hiyo ilikaliwa na Juma Kaseja, licha ya umbo lake kuwa dogo lakini alifanya vema.
Baada ya uwezo wake kufikia tamati kwa sasa naona dhahiri nafasi hiyo kwa sasa inanyemelewa na mlinda mlango wa Azam FC, Aishi Manula.
Kwa maana uwezo wake unadhihirika katika michezo mingi ya kitaifa na kimataifa akiwa na kikosi hicho chenye makazi yake Chamazi jijini Dar es Salaam.
Pia licha ya kufanya vema katika kikosi hicho anafanya vema katika kikosi cha timu ya taifa ni dhahiri kuwa ikiwa atazingatia maadili anaweza kufikia kiwango kikubwa na kuwa tegemeo kwa taifa siku zijazo.
Michuano ya Kagame
Nyota huyo katika mashindano ya Kagame ameonesha uwezo mkubwa na kudhihirisha kuwa ana sifa za kuitwa namba moja Tanzania kwani ameisaidia kutinga katika hatua ya fainali.
Wakiwa katika hatua ya robo fainali na mchezo wao dhidi ya Yanga alifanikiwa kupangua michomo ya vijana hao wa Jangwani.
Hali hiyo ilifanya kumaliza dakika 90 timu hizo zikiwa sare na kusababisha kupigiana mikwaju ya penaliti na kufanikiwa kupangua moja kati ya mikwaju hiyo.
Penalti aliyopangua ilipigwa na Mwinyi Haji, mlinzi aliyesajiliwa na Yanga akitokea visiwani Zanzibar na kufanikiwa kuiondosha katika michuano hiyo.
Licha ya hiyo tangu kuanza kwa michuano hiyo hajafungwa bao ndani ya dakika tisini za mchezo hali ambayo inayoonesha kuwa akiendelea kuaminiwa ataibeba vema Tanzania.
Baada ya mchezo huo kumalizika, nyota huyo analifafanua kuwa kudaka penalti kwake ni kitu cha kawaida na ndiyo maana alifanikiwa.
Moja ya maadili anatakiwa kufanya mazoezi ya kutosha, kutoshiriki anasa, pia anahitajika kufuata ushauri kwa waliomzidi maarifa langoni.
Kipa huyo ambaye ni mwenyeji wa Kilombero mkoani Morogoro tofauti na kuwa na uwezo mkubwa langoni pia anacheza vema mpira wa wavu.
Hali hiyo inamfanya kuwa na wigo mkubwa wa kuonesha kipaji kingine alichojaaliwa na Mwenyezi Mungu muumba mbingu na ardhi.
Tofauti na kushiriki michezo, nyota huyo anapenda kusikiliza muziki wa kizazi kipya na anavutiwa na kila msanii anayefanya ngoma safi.
Nyota huyo pia anaporejea mkoani Morogoro baadhi ya vitu anavyofanya na kuwa pamoja na rafiki zake wa karibu wakiwemo wachezaji wenzake aliokuwa akicheza nao kabla ya kufika Ligi Kuu.
Hali hiyo inamfanya kuwa karibu zaidi na wachezaji wenzake sanjari na kuishi vema na jamii bila kuonesha majivuno au kujisikia kama baadhi ya wachezaji wanavyofanya baada ya kuonekana wana mafanikio fulani.
Kikubwa kinachotakiwa sasa, mlinda mlango huyo aaminiwe kwa kupewa dhamana zaidi katika kikosi cha taifa baada ya kufanya vema katika klabu kwa maana uwezo wake umezidi kuhimalika.
0 comments:
Post a Comment