Marais wastaafu Jonathan, Guebuza kuongoza waangalizi wa uchaguzi.

Rais mstaafu wa Nigeria, Gooluck Jonathan, anatarajia kuongoza jopo la waangalizi wa uchaguzi kutoka Jumuia ya Madola. Huku Rais mstaafu wa Msumbiji, Armando Guebuza, akiongoza jopo la waangalizi wa Umoja wa Afrika (AU).

Kaimu Katibu Mkuu wa Wizara ya Mambo ya Nje na Ushirikiano wa Kimataifa, Balozi Yahya Simba, aliyasema hayo jana wakati akielezea kuhusu siku ya maadhimisho ya miaka 70 ya kuanzishwa kwa Umoja wa Mataifa (UN) inayotarajiwa kuadhimishwa Oktoba 13, mwaka huu na kwa Tanzania yatafanyika jijini Dar es Salaam.

“Rais mstaafu Jonathan ataongoza waangalizi wa Jumuiya hiyo inayoundwa na nchi wanachama 53 kutoka Afrika, Asia, Amerika, Ulaya na Pacific,” alisema.

Alifafanua kuwa waangalizi hao wamegawanyika katika makundi mawili moja likiwa la waangalizi na lingine la ukaguzi.

Balozi Simba aliongeza kuwa waangalizi hao wanatarajia kuwasili nchini siku yoyote kutoka sasa na wataungana na waangalizi wengine wakiwamo wa Jumuiya ya Ulaya (EU).

Alisema mbali na waangalizi hao, pia kuna waangalizi wengine wengi wakiwamo wa kutoka nchi za Maziwa Makuu ya Afrika ambao wametuma maombi kuja kufanya kazi hiyo.

Mratibu Mkaazi wa UN, Alvaro Rodriguez, aliwataka Watanzania kudumisha amani iliyopo kuelekea uchaguzi mkuu kwa kujifunza kutoka nchi nyingine ambazo ziko katika machafuko yaliyosababishwa na uchaguzi.

Alisema katika kuelekea maadhimisho ya miaka 70 ya UN yenye kauli mbiu `Umoja wa Mataifa imara, Dunia bora zaidi, Watanzania wanapaswa kuendeleza na kuidumisha amani iliyopo.

“Kuna nchi nyingi za Afrika ambazo awali zilikuwa na amani, lakini kwa sasa ziko katika machafuko na mapigano ya wenyewe, hivyo Watanzania wasiipeleke nchi yao katika hali hiyo,” alisema Rodriguez.

Alisema UN inasimamia kwa umakini lengo namba 16 linalosema amani kwanza kwa nchi zote duniani.

Alisema pia kauli mbiu ya maadhimisho ya miaka 70 tangu kuanzishwa kwa UN hapa nchini mbali na ile ya dunia nzima ni `Dunia moja watu bilioni saba kutunza mazingira ni wajibu wetu.”

Alisema Oktoba 12, mwaka huu kutakuwa na kongamano litakalohusu vijana wajimbue ili kuchukua uamuzi sahihi kukabiliana na changamoto na mgeni rasmi anatarajiwa kuwa Rais mstaafu, Benjamin Mkapa.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.