Mkurugenzi wa Utawala na Usimamizi wa Rasilimali watu Wizara ya Mambo ya Ndani ya Nchi Bi. Lilian Mapfa amewataka watumishi wote wa wizara hiyo kufanya kazi kwa kufuata taratibu, kanuni na sheria za utumishi wa umma ili kuleta ufanisi wa kiutendaji katika kuhudumia wananchi.
Mkurugenzi Mapfa ameyasema hayo leo wakati akipokea changamoto mbalimbali za kiutumishi kutoka kwa watumishi wa ngazi tofauti wanaofanya kazi katika wizara hiyo ikiwa ni sehemu ya Maadhimisho ya Wiki ya Utumishi wa Umma ambayo kilele chake ni leo.
Bi. Mapfa amesema kuwa ni muhimu watumishi wakafanya kazi kwa ushirikiano kwa kuwa ndio nguzo kubwa inayoleta ufanisi wa kiutendaji mahali pa kazi na hivyo kufanikisha majukumu ya wizara.
Katika kikao hicho ambacho ni sehemu ya Maadhimisho ya Wiki ya Utumishi wa Umma, Wakurugenzi wa Idara na Wakuu wa Vitengo vya wizara hiyo pia walishiriki na kupokea kero na changamoto mbalimbali zinazowakabili watumishi wao.
Miongoni mwa changamoto hizo ni pamoja na malipo ya fedha za likizo, malipo ya kazi kwa muda wa ziada pamoja na vitendea kazi.
Akijibu hoja mbalimbali zilizotolewa na watumishi hao Bibi. Mapfa amesema kuwa ofisi yake imepokea changamoto na kero mbalimbali zilizotolewa na hivyo zitafanyiwa kazi kwa mujibu wa sheria, kanuni na miongozo ya Utumishi wa Umma.
Aidha Bibi Mafpa amewataka watumishi wote kuimarisha upendo na amani miongoni mwao kwani ndio nguzo pekee inayochangia kuleta maendeleo ya kweli ya wizara na ya mtumishi mmoja mmoja.
Imetolewa na Kitengo cha Mawasiliano ya Serikali
Wizara ya Mambo ya Ndani ya Nchi.
0 comments:
Post a Comment