Katika ziara hiyo, Waziri alitoa siku 14 kwa maofisa wanaohusika na udhibiti wa dawa za kulevya mpakani hapo, kuwakamata watu wanaohusika na uvushaji wa dawa hizo kutoka nchini kwenda nchi jirani ya Zambia na nyingine zilizopo ukanda huu.
Bila kupoteza maneno, Waziri Nchemba alisema Tanzania hivi sasa imechafuka kutokana na wimbi la usafirishaji wa dawa za kulevya na kutoa mifano kwamba nchini China kuna Watanzania zaidi ya 200 wanashikiliwa kwa tuhuma za dawa za kulevya na kutaja nchi nyingine zenye wahalifu kutoka Tanzania kuhusiana na dawa za kulevya ni pamoja na Pakistan, India na Afrika Kusini.
Sisi tunaunga mkono agizo la Waziri la kuwasaka na kuwatia mbaroni wahalifu hao wa dawa za kulevya ili wakabiliane na mkono wa sheria na kupata wanachostahili kwa uhalifu huo.
Taarifa kwamba sasa Tanzania imefikia hatua kwa baadhi ya nchi kufikiria kuongeza masharti zaidi kwa kila atakayejitambulisha nje ya nchi kuwa ni Mtanzania, yanatuweka katika hali siyo nzuri miongoni mwa macho ya mataifa mengine duniani.
Mtazamo huo wa nchi nyingine dhidi ya Watanzania ni changamoto, ambayo hatuna budi kama taifa kuivalia njuga na kuona namna gani ya uhakika na bora zaidi ya kuwakabili wenzetu hao, wanaotuchafulia sifa na hadhi nzuri ya nchi yetu katika medani ya kimataifa.
Tungependa kutoa wito maalumu kwa maofisa wetu, wanaoshughulika na udhibiti wa biashara hiyo haramu ya dawa za kulevya, kuweka mikakati mipya na yenye kuleta tija vilivyo katika vita dhidi ya biashara hii haramu, ikiwa ni pamoja na kupatiwa nyenzo muhimu na za kisasa katika vita hii ngumu lakini inawezekana kudhibitiwa.
Ni muhimu pia kuelewa kwamba madawa ya kulevya ni vita ngumu karibu duniani kote kutokana na wahusika katika biashara hii kuwa na uwezo wa kifedha, lakini hapa tungependa pia wananchi, viongozi mbalimbali na jamii kwa ujumla kutoa kila aina ya ushirikiano kuwafichua watu wanaojihusisha na biashara hii kwa sababu tunaishi nao katika maeneo yetu mbalimbali.
Dawa za kulevya ni adui mkubwa duniani, hususan kwa vijana ambao ndiyo walinzi wa taifa lolote lile makini na hivyo tuna kila sababu ya kuwalinda vijana wetu dhidi ya kujihusisha na matumizi yake pamoja na kufanya biashara ya kusafirisha kwenda nchi mbalimbali.
Sisi tunaamini kwamba umoja ni nguvu na tukitoa ushirikiano kwa vyombo vyetu vya ulinzi na usalama, vinavyoshughulika na janga hili, tutafanikiwa kudhibiti hali hiyo na kulinda hadhi na sifa ya taifa letu. Tupambane nao mpaka kieleweke.
0 comments:
Post a Comment