Hongera Jaji Mutungi, lakini una kazi kubwa.

Jumanne ya wiki hii Msajili wa Vyama vya Siasa nchini, Jaji Francis Mutungi ameendelea kutoa angalizo kwa vyama vya siasa na wanasiasa, kuzingatia Sheria ya Gharama za Uchaguzi ili kuepuka kufikishwa mahakamani kwa kukiuka sheria hiyo.

Msajili ambaye ni Mlezi wa Vyama vya Siasa nchini kwenye mkutano wake juzi na waandishi wa habari alikuwa na hoja kuu mbili, kwanza ni kuendelea kukumbusha angalizo lake kwa vyama hivyo la kuvitaka viache kuanzisha ‘majeshi’ kitendo ambacho ni kinyume na sheria za nchi.

Hata hivyo, hoja ya pili na ndiyo msingi wa maoni yetu ni kuhusiana na sheria ya gharama za uchaguzi ya mwaka 2010, ambapo rasimu yake ilijadiliwa kwa siku mbili na vyama vya siasa chini ya aliyekuwa Msajili wa Vyama vya Siasa, John Tendwa.

Mkutano wa Tendwa na wanasiasa hao ulielezwa kukubaliana kwamba fedha anazopaswa kutumia mgombea urais kuanzia mchakato wa kuteuliwa na chama hadi kampeni wakati wa Uchaguzi Mkuu usizidi Sh5 bilioni, na fedha anazotakiwa kutumia mgombea wa kiti cha ubunge zimegawanywa kulingana na jimbo.

Kwa mantiki hiyo, Jaji Mutungi hazungumzi kitu kipya kwa wanasiasa hao, anachofanya ni kuwakumbusha wajibu wao wa kutekeleza sheria walioshiriki mchakato wake, kwamba matumizi ya fedha kupita kiasi yanaweza kuondoa sifa kwa mgombea au chama husika.

Sote ni mashahidi kwamba wakati Jaji Mutungi akitoa angalizo, tayari Chama cha Mapinduzi kiko kwenye mchakato wa kumtafuta mgombea wake wa urais, na minong’ono ya matumizi makubwa ya fedha imeshaanza.

Msisitizo wa Jaji Mutungi ni kwamba ofisi yake itachukua hatua dhidi ya ukiukaji wa sheria hiyo endapo atapata ushahidi wa kutosha. Hatujui Jaji Mutungi anataka ushahidi gani, lakini watangulizi wake ni mashuhuda wa malalamiko kutoka kwa vyama vya upinzani kwamba chama tawala kimekuwa kikitumia mali za umma, kama magari na majengo katika kampeni za kisiasa za wagombea wake na hakuna hatua zilizochukuliwa.

Tunajiuliza hawa watanganzania ndani ya CCM ambao baadhi ni watumishi wa Serikali na katika mchakato wa kutafuta wadhamini mikoani kwa mujibu wa taratibu za chama chao, wanadaiwa kutumia vyombo vya usafiri vya Serikali na kuna wengine wanatumia watumishi na ofisi za Serikali katika kufanikisha safari zao za kisiasa, wanaguswa na sheria hii?

Huko mikoani wanakokwenda kutafuta wadhamini vipi kuhusu mapokezi wanayoyapata kutoka kwa viongozi wa Serikali wa maeneo hayo, tunajiuliza hivyo sababu kuna baadhi ya watangazania wana nyadhifa kubwa serikalini, hivyo kuwafanya ma-RC na ma-DC kulazimika kujumuika nao katika safari zao za kisiasa, na wao sheria inawagusaje?

Pamoja na kuungana na Jaji Mutungi kuwaonya wanasiasa, lakini tunajiuliza iwapo gharama za uchaguzi zilizowekwa na mtangulizi wake kwa kushirikiana na wadau wa vyama vya siasa kama bado zinaweza kukidhi gharama za wakati huu za kisiasa, hasa ikizingatiwa shilingi imeshuka thamani na gharama za maisha zimepanda. Tunasema hongera kwa kazi uliyoianza, lakini una kazi kubwa.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.