Migomo sio suluhisho la matatizo,idhibitiwe.

MWEZI Mei mwaka huu madereva wa vyombo vya usafirishaji katika maeneo mbalimbali nchini walifanya mgomo wa kutotoa huduma za usafiri kwa madai ya kutakiwa kurudi vyuoni kwa mafunzo zaidi ya usalama barabarani. Hali ya mgomo huo ulisababisha adha kubwa kwa abiria wa vyombo hivyo, hasa wale waliokuwa wakielekea mikoani, kwani katika Stendi Kuu ya Mabasi ya Ubungo jijini Dar es Salaam, hakuna basi hata moja lililoondoka huku daladala nazo zikiwa hazionekani kabisa vituoni.
Uongozi wa madereva walidai kuwa hawawezi kurudi mafunzoni kwani kazi wazifanyazo si za kudumu na hivyo watakaporudi mafunzoni hali ya maisha yao itatetereka, kutokuwa na uwezo wa kulipa ada na mengineyo.
Baada ya kutoa sababu hiyo Serikali na wamiliki waliingilia kati na kukubali kuwalipia ada ya mafunzo hayo waliyotakiwa kufanya mara tu leseni inapoisha yaani miaka mitatu na baadaye suala hilo likasitishwa.
Lakini baada ya kusitishwa kwa agizo hilo bado waliendelea kugoma na kubadili madai yao kwa kusema wanahitaji Serikali kukaa na wamiliki na kupatiwa mikataba ya kudumu ya kazi zao ambapo wamiliki walikubali.
Sasa wanatishia kugoma wakiwa na madai kuwa mikataba ya ajira waliyopatiwa na wamikili Mei 19 mwaka huu yametolewa mambo muhimu ambayo ni bima ya ajali, kodi ya nyumba, matibabu, usafiri, likizo na nauli ya kila siku baada ya kazi.
Wamedai kuwa ikiwa Serikali haitakubaliana na wamiliki kurudisha mambo hayo kwenye mikataba watafanya mgomo kuanzia Ijumaa, jambo ambalo limepingwa na wamiliki wa mabasi nchini na kueleza watakaogoma wakati mazungumzo yanaendelea watafukuzwa kazi.
Naunga mkono wamiliki waliotoa kauli bila kusita kwani madereva wameonesha jinsi wamekosa shukrani licha ya kusikilizwa madai ya kila walipotoa.
Ni dhahiri kuwa hata kama madai yao yangekuwa yana msingi, jambo la kujiuliza ni kuwa hawana njia nyingine ya kutatua matatizo hayo bila ya kufanya mgomo ambao unawaathiri wananchi ambao hawana uwezo wa kutimiza matakwa yao?
Ikiwa wameweza kupatiwa mikataba ya ajira zao kwa nini wanashindwa kuwa wavumilivu na kufuatilia wakati wamiliki wamekubali kufanya mazungumzo na jambo la kujiuliza ni wafanyakazi wangapi nchini wanapata mahitaji hayo wanayotaka.
Ili kudhibiti suala hilo ni vema mamlaka husika liwemo Jeshi la Polisi kitengo cha Usalama Barabarani, Mamlaka ya Udhibiti wa Usafiri wa Nchi Kavu na Majini (SUMATRA) na Mamlaka nyinginezo kuingilia kati na kuacha kuwabembeleza madereva hao kwa kuchukua hatua stahili. Kwa hakika, migomo siyo suluhu la matatizo yoyote isipokuwa kukaa na mamlaka husika.
Ni vema kuangalia suala hilo kwa hekima na undani ili kuwaondolea usumbufu wananchi pale inapotokea mgomo kwa kuwapa mahitaji yao stahili na ikiwa majadiliano yanaendelea ni vema kuwaeleza ili kuondoa jazba.
Kwani kusubiri wagome ndipo wasikilizwe matatizo yao ni hatari kwani inakuwa tayari madhara mengi yamepatikana kwa wananchi wanaotegemea usafiri wa umma, hivyo ni vema kusikilizwa nao kuelewa wanachoelezwa bila kutoa vitisho vya kugoma.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.