Mtibwa Sugar imeamua kuachana na kocha Mbelgiji Piet De Mol.

KLABU ya soka ya Mtibwa Sugar ya Turiani Morogoro imeamua kuachana na kocha Mbelgiji Piet De Mol iliyokuwa iingie naye mkataba wa kuifundisha msimu wa mwaka 2015/2016.Akizungumza na gazeti hili jana, Mkurugenzi wa Mtibwa Sugar, Jamal Bayser alisema kocha De Mol alifika nchini kwa mazungumzo ambapo walizungumza naye, lakini wameshindwa kuingia naye mkataba kutokana na sababu zilizo nje ya uwezo wao.
“Ni kweli kocha huyo alikuja mpaka Manungu, akakagua kambi, lakini kwa bahati mbaya sana tumeshindwa kusainiana naye mktaba kutokana na sababu zilizo nje ya uwezo wetu,” alisema Bayser.
Alisema hivyo timu itaendelea kuwa chini ya kocha Mecky Maxime ambaye anaendelea na usajili kwa ajili ya msimu mpya.
“Kwa hiyo mpaka sasa timu itaendelea kuwa chini ya Mecky mpaka hapo itakapotangazwa vinginevyo, na tayari ameanza kufanya usajili, si kwamba hatufanyi usajili kama wengine wanavyosema tunafanya chini ya kocha wetu Mecky na tunaamini tutakuwa na timu nzuri msimu ujao,” alisema.
Mtibwa Sugar iliyowahi kufanya vizuri miaka ya nyuma na kutwaa ubingwa msimu wa mwaka 1999 na 2000, imekuwa ikiporomoka siku hadi siku ikiwa haijarudia makali yake kwa zaidi ya misimu mitano.
Licha ya kuanza vizuri msimu uliopita na kuongoza msimamo wa Ligi Kuu kwa muda mrefu, lakini ilijikuta ikivurunda kwenye mzunguko wa pili na kufikia hatua ya kupambana kutoshuka daraja. Ilimaliza ligi ikiwa nafasi ya saba baada ya kufikisha pointi 31 sawa na JKT Ruvu, Ndanda na Stand United.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.