Simba yaanza mazoezi Dar es Salaam.

TIMU ya soka ya Simba jana asubuhi ilianza rasmi mazoezi ya Gym kwa ajili ya kujiandaa na msimu ujao wa Ligi Kuu ya Tanzania Bara inayotarajia kuanza kutimua vumbi mwezi wa nane mwaka huu.
Kocha msaidizi wa timu hiyo Selemani Matola, ndiye aliyesimamia mazoezi hayo yaliyofanyika kwenye Gym iliyopo karibu na mataa ya Veta na kuhudhuriwa na wachezaji tisa wengi wao wakiwa ni wale wa kikosi cha pili.
Akizungumza na gazeti hili Matola, alisema wameanza taratibu kwa ajili ya kuweka miili ya wachezaji wao sawa kutokana na mapumziko ya muda mrefu na baada ya kukaa sawa watahamia uwanjani pamoja na ufukweni ili kutengeneza nguvu kwa kikosi chao cha msimu ujao.
“Ninachofanya hapa ni kuiandaa miili yetu kwa ajili ya kazi tumedhamiria kufanya kazi ndiyo maana leo tupo hapa na baada ya kuwasili kwa Kocha Mkuu Dylan Kerr, kuanzia Jumatatu tutabadili mpangilio wa mazoezi yetu,” alisema Matola.
Nahodha huyo wa zamani alisema hawezi kusema mambo mengi hivi sasa kwa sababu timu ndiyo imeanza mazoezi siku ya kwanza, lakini anafurahishwa na jitihada zinazofanywa na uongozi wa timu yake katika kukiboresha kikosi chao cha msimu ujao.
Hadi hivi sasa Simba imekamilisha usajili wa wachezaji watatu ambao ni Mohamed Faki, Peter Mwalyanzi na Samir Hajji Nuhu huku wachezaji Leodit Mavugo na Paol Kiongera nao wakitajwa kuongezwa kwenye usajili wa msimu ujao.
Wachezaji waliohudhuria kwenye mazoezi ya jana asubuhi ni Mohamed Hussein ‘Tshabalala’, Said Ndemla, Awadhi Juma, Denis Richard, Mussa Hassan ‘Mgosi’, Issa Abdallah, Mbaruku Yusufu, David Kisu na Hassan Kessy.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.