CCM yaitisha Kamati Kuu kwa dharura.

Mwenyekiti wa Chama cha Mapinduzi (CCM), Rais Jakaya Kikwete (pichani)ameitisha kikao cha dharura cha Kamati Kuu (CC) kitakachofanyika kesho mjini Dodoma, huku ajenda kuu ikiwa ni kupitisha majina ya wagombea nafasi ya ujumbe wa Halmashauri Kuu (NEC), zilizo wazi kutokana na sababu mbalimbali.

Kitengo cha Mawasiliano cha CCM kimethibitisha uwapo wa kikao hicho ambacho pia kitapitia orodha ya makada wa chama hicho wanaowania urais.

Kikao hicho kitatanguliwa na kikao kingine cha sekretarieti kinachofanyika leo ambacho kitaongozwa na Katibu Mkuu wake, Abdulrahman Kinana.

Mpaka sasa, makada 40 wamejitokeza kuomba nafasi ya kuipeperusha bendera ya CCM katika kiti cha urais, kwenye Uchaguzi Mkuu Oktoba 25, wengi wanaendelea na kazi ya kukusanya wadhamini katika maeneo mbalimbali ya nchi.

Juzi, wakati akizungumza na Televisheni ya Taifa (TBC), Makamu Mwenyekiti wa CCM - Bara, Philip Mangula aligusia kidogo juu ya wagombea urais na kusema atakayepitishwa hatajiuza mwenyewe, bali atauzwa na chama hicho alichodai kuwa kina wanachama milioni saba nchi nzima.

Chama hicho tawala kinakabiliwa na wakati mgumu wa kupitisha jina la mgombea urais kutokana na idadi kubwa ya waliojitokeza kuwania nafasi hiyo jambo ambalo halikujitokeza wakati wa upitishwaji wa mgombea urais wa chama hicho mwaka 1995 na 2005.

Taarifa kutoka ndani ya chama hicho zinaeleza kuwa huenda kikao hicho kikahudhuriwa na wajumbe wachache kutokana na kuitishwa kwa dharura.

Ilieleza kuwa kuna nafasi zilizo wazi kutokana na sababu mbalimbali, kuanzia ngazi za wilaya mpaka taifa na kwamba lazima zijazwe katika kipindi hiki cha kuelekea Uchaguzi Mkuu ili kila mtu atimize wajibu wake.

“Kuna nafasi za makatibu na wenyeviti ambazo ziko wazi kuanzia wilayani mpaka taifa. Kikao hicho kinakwenda kuzibainisha na kisha kuzijaza,” kilieleza chanzo hicho.

Suala jingine litakalojadiliwa katika kikao hicho ni mabadiliko ya uongozi katika nafasi ya Mhariri Mtendaji wa Gazeti la Uhuru, Joseph Kulangwa ambayo imesababisha mgomo wa wafanyakazi wanaopinga uamuzi huo. Gazeti hilo ni la chama hicho tawala.

Kwa mujibu wa ratiba ya chama hicho, Kamati ya Usalama na Maadili itafanya kikao chake Julai 8 na kufuatiwa na Kamati Kuu Julai 9 ambayo inatarajiwa kuchuja wagombea hao 40 na kupata watano ambao majina yao yatawasilishwa Halmashauri Kuu ya CCM (NEC) itakayofanyika Julai 10 kuchuja wagombea hao na kubaki watatu watakaopigiwa kura na mkutano mkuu kumpata mmoja. Mkutano huo mkuu utafanyika Julai 11 na 12 .

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.