Akidi kupimwa kwa jicho la Spika hii sasa ni kejeli.

Tambarare Halisi jana tuliandika habari iliyosema wabunge 33 ndiyo waliopitisha Muswada wa Benki ya Posta Tanzania. Idadi hiyo ni ndogo ikilinganishwa na idadi ya wabunge wote ambao ni 356 na nusu yao ni 178. Mahudhurio duni bungeni yameanza kukithiri katika Bunge hili la 10 na kuzoeleka kama tabia au utamaduni mpya wa wabunge.

Hali hii ilimkera hata Spika wa Bunge, Anne Makinda ambaye aliikemea tabia ya utoro kwa wabunge akisema kuwa baadhi yao wamekuwa na tabia ya kukacha vikao na kusafiri bila ruhusa yake wala ya Waziri Mkuu, Mizengo Pinda.

Tunaungana na Spika Makinda kukemea utoro, lakini pia tukishangaa yanayoendelea bungeni ikiwamo wabunge kiduchu kupitisha miswada mbalimbali ya Serikali na hata bajeti za wizara.

Kuna mifano mingi kuhusiana na hilo. Wakati wa kupitisha Muswada wa Sheria ya Masoko ya Bidhaa wa mwaka 2015, mahudhurio yalikuwa duni kwani ni wabunge 37 tu ndiyo walipitisha muswada huo huku mawaziri na naibu mawaziri wakiwa wanne tu.

Pia, mjadala wa muswada wa Sheria ya Usimamizi wa Maafa ulihudhuriwa na wabunge 81, lakini hali ilikuja kuwa mbaya zaidi wakati wa kujadili Muswada wa Sheria ya Usimamizi na Udhibiti wa Silaha na Risasi, ambako kulikuwa na wabunge 29.

Hata hivyo, hoja za baadhi ya viongozi wanaosimamia vikao vya Bunge zimeonekana kuitetea hali hiyo. Mathalan, Naibu Spika Job Ndugai alinukuliwa na gazeti hili akisema akidi hupimwa kwa jicho la Spika na kwa uthibitisho wa macho yake, Bunge lilipitisha Muswada wa Benki ya Posta Tanzania, huku idadi ya wabunge ikiwa ni 33 tu.

Mtetezi mwingine ni Mwenyekiti wa Bunge, Mussa Azzan Zungu ambaye amewahi kunukuliwa na baadhi ya vyombo vya habari, akitetea kuwa bajeti za wizara zinaweza kupitishwa hata kama idadi ya wabunge ikiwa ndogo, isipokuwa kwa bajeti kuu kwamba hapo lazima akidi izingatiwe.

Lakini jambo la ajabu katika kikao hiki hiki, Naibu Spika Ndugai alilazimika kuahirisha kupitishwa kwa bajeti ya Wizara ya Kilimo, Chakula na Ushirika, baada ya kujiridhisha kuwa idadi ya wabunge waliokuwapo ukumbini wakati huo ilikuwa ndogo, hadi anaahirisha kikao, ukimbini kulikuwa na wabunge 110.

Ndugai aliahirisha kikao baada ya Mbunge wa Kuteuliwa, James Mbatia kutumia Kifungu namba 112 (1) cha Masharti ya Kanuni ya 77 kinachosema kwamba, Kamati ya Bunge zima haitafanyika pale idadi ya wabunge waliohudhuria itakapokuwa bado haifikii nusu ya wabunge wote.

Zungu anasema bajeti za wizara zinaweza kupitishwa hata kama akidi haitimii, Naibu Spika Ndugai anasema akidi inapimwa kwa macho, lakini anapochachamaliwa na wabunge anakubali kufuata kanuni kuhusiana na akidi. Tunahoji kwa nini Ndugai awe na kauli mbili tofauti?

Ukiisoma Katiba ya Jamhuri ya Muungano wa Tanzania, Ibara ya 94 (1) inaeleza kuwa upitishwaji wa jambo lolote linalohusu uamuzi wa wabunge, ni lazima akidi iwe ni nusu ya wabunge wote kama ilivyo Kanuni ya 77 ya Bunge.

Tungependa kuwakumbusha wabunge wetu kwamba akidi katika mijadala na wakati wa kupitisha miswada na bajeti za wizara mbalimbali ni jambo muhimu, pia kanuni na sheria kuhusu akidi zifuatwe. Wabunge wachache kufanya uamuzi wa Bunge ni jambo ambalo halikubaliki na ni sawa na kuwakejeli wananchi waliochagua.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.