Zoezi hilo ambalo lilianza Julai 22 na kutazamiwa kuhitimishwa Julai 31, mwaka huu kwa mujibu wa Mkuu wa Mkoa wa Dar es Salaam, Saidi Meck Sadiki, kila kukicha limekuwa likikumbwa na sarakasi, vituko na majanga kutokana na kutokuwepo usimamizi mzuri katika uandikishaji.
RC Sadiki awali kabla ya uandikishaji alisema kuwa takriban wakazi milioni mbili wanatarajiwa kuandikishwa katika BVR na kwa wakazi wenye sifa takriban milioni mbili wa jiji la Dar es Salaam.
Akaongeza kuwa vituo 1,684 vitatumika katika uandikishaji ambapo katika manispaa ya Ilala vituo 396, Temeke 572 na Kinondoni 706.
Kwa upande wa Manispaa ya Temeke watakuwepo maofisa waandikishaji 1,144 ambapo wa akiba ni 128, waandishi wasaidizi 572 na na wa akiba 128.
Manispaa ya Ilala maofisa waandikishaji watakuwa 792 na wa akiba 144, waandishi wasaidizi 136 na wa akiba 144.
Aidha, Sadiki akasema katika manispaa hizo kutakuwepo na ofisa mwandikishaji wa Halmashauri, Ofisa uchaguzi, maofisa wasaidizi wa majimbo na kata na wataalamu wa Tehama.
Ukiangalia tarakimu hizi, utajiridhisha kwamba endapo uratibu na usimamizi utakuwa mzuri, hayatakuwepo malalamiko yoyote katika zoezi zima.
Lakini cha ajabu ni kwamba viongozi wetu wanageuka kuwa wazungumzaji wazuri wa mipango ya kuwahudumia wananchi lakini kumbe ni kiini macho tu.
Uandikishaji Dar hadi sasa umekuwa ni kero, malalamiko, misururu ya foleni inayochefua, jambo ambalo pia limechangiwa na baadhi ya viongozi na watendaji kutumia mwanya huo kujinufaisha.
Wengine bila hata aibu wameanzisha mradi kwa kuandikia watu vimemo ambavyo hupita navyo milango ya nyuma ili waandikishwe haraka, kisa tu katoa rushwa kwa mtendaji na washirika wake.
Mtu anaandikiwa leo kikaratasi na mtendaji kikimwelekeza kuja kituoni kesho yake kwa ajili ya kujiandikisha. Afikapo anahudumiwa haraka kwa kuwa tayari alishatoa rushwa.
Wananchi wengi wameitikia wito wa kuandikishwa lakini wanakatishwa tamaa jinsi zoezi linavyofanyika, huku wengine wakilala vituoni ili kuwahi nafasi. Mara zitolewe namba ambazo wengine wanabaki nazo mikononi wakati wengine wanaopenyezwa kwa vimemo wanahudumiwa na kuondoka haraka.
Hii ni aibu na dhambi kubwa kwa viongozi wetu ambao wanavuruga taratibu pasipo sababu ya msingi.
Wananchi wanategemea kuwa haki inatendeka kwa yule aliyewahi kituoni kuhudumiwa kwanza na siyo aliyekuja mwisho, kwa sababu tu ametoa rushwa.
Siyo hivyo tu, katika maeneo mengine hata hao maofisa uchaguzi na wasaidizi wa majimbo na kata hawaonekani ili kuweza kusimamia kuhakikisha uandikishaji unakwenda inavyotakiwa.
Pia limezuka tatizo la baadhi ya mashine za uandikishaji kufichwa kwenye nyumba za watu. Hii ikitia shaka kuwa huenda lipo zoezi la siri linalofanyika kuandikisha watu kinyemela kwa sababu zisizofahamika. Hii ni dhambi ambayo ina mwisho wake.
Sisi tulidhani kuwa kwa sababu mashine zote zilizokuwa zikitumika nchini zitamwagwa Dar, basi uandikishaji hautakuwa na tatizo.
Na katika vituo zingekuwepo mashine zaidi ya moja ili kuharakisha zoezi, hasa kwa kuzingatia kwamba muda wa siku kumi uliotolewa unaweza usitoshe kwa kila mlengwa kuandikishwa.
Viongozi wetu ni muhimu wawe makini linapofanyika jambo la kitaifa kama hili la Uboreshaji wa Daftari la Kudumu la Wapigakura. Wasiwe watu wa maneno tu pasipo vitendo. Kama umepangiwa kusimamia eneo fulani, timiza wajibu wako.
Lakini pia viongozi wa ngazi za juu kwenye tume ni muhimu waweke mfumo wa ufuatiliaji wa karibu kuona kwamba maofisa wake pamoja na wasaidizi hao wanasimamia yale waliyoelekezwa na siyo kuishia kupeana posho lakini maeneo ya usimamizi hawapo.
Na hicho ndicho kilichojitokeza Dar es Salaam kwa sababu katika vituo vingi, maofisa wa ufuatiliaji hawapo na ndio maana malalamiko yamezidi kuwa mengi kiasi cha wengine kukata tamaa ya kujiandikisha.
Tume ya uchaguzi ijipange isifanye masihara na masuala kama haya ya kitaifa. Tunajiuliza; Huu ni uandikishaji tu, ikifika uchaguzi itakuwaje?
0 comments:
Post a Comment