Hizi ndio siku Saba za Ukawa kumuweka wazi Mgombea wake wa Urais.

Umoka wa Katiba ya Wananchi (Ukawa) umesema utamtangaza mgombea wao wa urais baada ya siku saba kuanzia sasa.

Akizungumza na waandishi wa habari baada ya kumalizika kwa kikao kirefu cha majadilino cha viongozi wa vyama vinavyounda umoja huo jijini Dar es Salaam jana usiku, Mwenyekiti Mwenza wa Ukawa, James Mbatia, alisema wamekubaliana kutangaza mgombea baada ya siku saba li kutoa nafasi kwa viongozi walioshiriki majadaliano hayo kutoa taarifa kwa wanachama wa vyama vyao juu ya mambo waliokubaliana.

Ukawa unaundwa na Chama cha Wananchi (CUF), Chama cha Demokrasia na Maendeleo (Chadema), NCCR-Mageuzi na NLD.

Viongozi hao kwa siku nzima ya jana walijifungia ili kusaka muafaka ikiwa ni muendelezo wa vikao kadhaa kama hivyo juu ya mgawanyo wa majimbo na mtu anayefaa kusimamishwa kugombea urais.

Aidha, Mbatia alikanusha uvumi kuwa kada wa CCM Waziri Mkuu wa zamani, Edward Lowassa, ana mpango wa kujiunga na umoja huo ili apewe nafasi ya kugombea urais baada ya kukosa nafasi hiyo kupitia chama chake.

“Huo ni uvumi tu wa kwenye mitandao na hata sisi tunashangaa taarifa hizo zinatoka wapi. Sisi tumeshamaliza mchakato wetu wa kumpata mgombea wa urais na tutamtangaza rasmi baada ya siku saba kuanzia sasa,” alisema.

Mbatia pia alikanusha uvumi ulioenea kwenye mitandao ya kijamii kuwa kuna mvutano mkubwa ndani ya Ukawa katika suala la mgombea urais ambao umesababisha CUF kutaka kujitoa.

“Hakuna ukweli katika hilo na hata leo (jana) nimeongea na Prof. Lipumba (Prof. Ibrahimu Lipumba, Mwenyekiti wa CUF) kumtaarifu hatua tulioyofikia hivyo hakuna mpasuko wowote,” alisema Mbatia.

Hata hivyo, habari kutoka ndani ya kikao hicho cha viongozi wa juu wa vyama vinavyounda Ukawa zinasema kuwa viongozi wakuu wa CUF, Mwenyekiti Lipumba na Katibu Mkuu wake, Maalim Seif Sharif Hamad au Naibu wake, Magdalena Sakaya, hawakuhudhuria. Waliwakilishwa na kiongozi mmoja mwandamizi.

Vyama vingine, walihudhuria wenyeviti na makatibu wao.

Jana Watanzania walikuwa na matarajio kuwa mgombea wa Ukawa angetangazwa, hata hivyo baada ya kusubiri kwa muda mrefu, taarifa iliyotolewa usiku imesogeza tena mbele muda wa kumfahamu kwa siku saba.

Awali Ofisa wa Habari wa Chadema, Tumaini Makene, aliwaambia waandishi wa habari kuwa:

"Mambo mengine yote yameisha, sababu iliyofanya majadiliano kuwa marefu na kuchelewa kutolewa kwa taarifa hadi sasa ni majimbo mapya yaliyoongezwa na kutangazwa na Nec, "alisema.

Ijumaa iliyopita Ukawa walitoa taarifa ya kwamba wangemtangaza mgombea wake ndani ya saa 24, ahadi ambayo haikutimizwa.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.