Vyama, Nec wajadili maadili ya uchaguzi.

Vyama vya siasa nchini, vimeitaka Tume ya Taifa ya Uchaguzi (Nec), kuweka wazi gharama za kuendesha uchaguzi mkuu, Oktoba 25 mwaka huu na uwiano sawa wa ruzuku itakayotolewa kwa mgombea wa urais wa chama husika.

Hayo yalisemwa jijini Dar es Salaam jana na Naibu Katibu Mkuu Bara wa Chama cha Alliance for Democratic Change (ADC), Doyo Hassan, wakati wa mwendelezo wa uchambuzi wa maadili ya uchaguzi wa Rais, wabunge na madiwani wa mwaka 2015.

“Tume ya uchaguzi isimamie vizuri gharama za uchaguzi na ziwe wazi ili kuepusha migogoro kwenye vyama,” alisema.

Alilishauri Jeshi la Polisi kutoa mafunzo kwa askari wao kwa ajili ya shughuli za uchaguzi ili kuepuka vitendo vya uonevu ambavyo vinaweza kujitokeza.

Alisema vyombo vya ulinzi na usalama visitumike kukandamiza wagombea na wafuasi wa chama chochote cha siasa.

Mkuu wa Oganaizesheni wa NCCR-Mageuzi, Faustine Sungura, aliitaka Nec kuhakikisha inadhibiti matumizi ya magari ya serikali kutumiwa na vyama vya siasa katika kampeni za uchaguzi.

Kila chama kinatakiwa kutumia magari yake kuendesha shughuli zake za kampeni wakati wa uchaguzi.

Vyama hivyo pia viliishauri Nec kutopeleka masanduku ya kura kwenye kambi za jeshi badala yake wanajeshi wapige kura katika vituo vya kupigia kura vilivyopo uraiani, kinyume chake ni kuwanyima uhuru.

Mwenyekiti wa Nec, Jaji Damian Lubuva, alisema wao hawaruhusu vyombo vya uchaguzi kupiga kura kwenye kambi za jeshi na kuahidi kulifuatilia suala hilo.

Msajili wa Vyama vya Siasa, Jaji Francis Mtungi (pichani), aliitaka Nec kuviwezesha vyama vya siasa kwenye uchaguzi ili viweze kuwahudumia mawakala wao kutokana na vingine kupata ruzuku na vingine kukosa.

Jaji Lubuva alisema mapendekezo hayo yatafanyiwa marekebisho kabla ya kusaini maadili hayo.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.