NEC yaionya Ukawa kutangaza matokeo ya urais.

SIKU moja baada ya Mwanasheria wa Chama cha Demokrasia na Maendeleo (Chadema), Mabere Marando kukaririwa akisema atatangaza matokeo ya uchaguzi kabla ya Tume ya Taifa ya Uchaguzi (NEC) kufanya hivyo, Tume hiyo imesema anataka kuleta vurugu nchini.
Vilevile, NEC imewaonya wanasiasa kuacha kuingilia kazi zake na badala yake wafanye kazi zao za kunadi wagombea wao katika majukwaa.
Marando alitoa kauli hiyo juzi jijini Dar es Salaam kwa niaba ya Umoja wa Katiba ya Wananchi (Ukawa), ambao umempendekeza Edward Lowassa kuwania urais kupitia Chadema.
Ukawa ni muungano wa vyama vinne, Chadema, NCCR-Mageuzi, National League for Democracy (NLD) na Chama cha Wananchi (CUF).
Mkurugenzi wa NEC, Kailam Ramadhan aliliambia gazeti hili Dar es Salaam jana kuwa mwenye mamlaka ya kutangaza matokeo ni Tume pekee yake na kuwataka wanasiasa, akiwemo Marando kuwa makini na kauli zao ili zisilete machafuko nchini.
Ramadhan alisema umakini kwa wanasiasa unahitajika sana hasa katika kipindi cha kuelekea uchaguzi mkuu. Mkurugenzi huyo alisema matokeo yote yatatangazwa na Tume au mtu yeyote endapo watamkasimisha, hivyo wananchi wasisikilize maneno ya wanasiasa.
Alisema Tume imepewa mamlaka kisheria kutangaza matokeo ya uchaguzi ya udiwani, ubunge na urais kwa mujibu wa sheria iliyopitishwa na wabunge na siyo vinginevyo.
“Sasa hao wanaosema watatangaza matokeo ya uchaguzi katika kila kituo watakuwa wanafanya mambo kinyume cha sheria labda watangaze matokeo ya chama chao, kwani hicho wanachotaka kufanya ni kuleta vurugu katika uchaguzi,” alisema.
Ramadhan alisema watu wasifikiri sheria hiyo ni ya NEC, kwani ilipitishwa na wabunge na wanasiasa wenyewe wanafahamu, hivyo hadi dakika ya mwisho wenye mamlaka ya kutangaza matokeo ni Tume yenyewe.
Aliwataka wanasiasa kufuata sheria na wananchi wasibabaishwe na kauli hizo, kwani NEC ndiyo yenye mamlaka na kama wanaona sheria hiyo si sahihi waende bungeni kubadilisha.
Marando alitoa kauli hiyo juzi jijini Dar es Salaam baada ya Lowassa kumtaka kutoa ufafanuzi wa madai kuwa shahada za kura za askari polisi na askari wa Jeshi la Wananchi Tanzania (JWTZ) zinakusanywa na viongozi wao.
Kutokana na hali hiyo, Marando alisema njama zote zinazotumiwa na Chama Cha Mapinduzi (CCM) za kutaka kuhujumu matokeo, zikiwamo za kukusanya shahada za polisi na wanajeshi wamezigundua na wamepanga kuzikabili.
“Njama zote walizonazo kutaka kujaribu kuhujumu kura za Lowassa, wabunge na madiwani pamoja na kuhujumu kura za Zanzibar tutazidhibiti, nawaambia mawakala baada ya kupiga kura tu msisubiri saa 12.00 jioni, nitumieni saa 7.00 mchana nitatangaza matokeo, mheshimiwa usiwe na wasiwasi, endelea na kazi yako,” alisema.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.