Mbali na kutengua matokeo hayo, kamati hiyo iliyokuwa chini ya Mwenyekiti wa CCM Taifa, Rais Jakaya Kikwete pamoja na mambo mengine imeamuru kura hizo zirudiwe katika majimbo hayo kesho.
Katibu wa Itikadi na Uenezi wa CCM, Nape Nnauye aliwaambia waandishi wa habari mjini hapa jana kuwa Kamati Kuu imeagiza kura hizo kurudiwa kutokana na kugubikwa na malalamiko mengi.
Nape alisema Kamati hiyo imeagiza upigaji wa kura hizo za maoni urudiwe katika majimbo matano ya Busega, Kilolo, Rufiji, Makete na Ukonga.
“Kamati Kuu imeagiza kurudiwa kwa mchakato huo kutokana na dosari mbalimbali zilizojitokeza na siwezi kuziweka hadharani ila agizo ni hilo kura zirudiwe kesho siku ya Alhamis, vinginevyo vikao vinaendelea,” alisema Nape.
Wakati akifungua kikao hicho, Rais aliwataka wajumbe kufanya kazi iliyowapeleka Dodoma ambayo wananchi wanaisubiri kwa hamu kubwa ya kupitia na kupitisha uteuzi uliofanywa katika kura hizo huku kikao hicho kikiwa na wajumbe 25 kati ya 32.
Busega
Kabla ya Kamati Kuu ya CCM kutaka kura za maoni kurudiwa Jimbo la Busega lilipo mkoani Geita, Waziri wa Maendeleo ya Mifugo na Uvuvi, Dk. Titus Kamani alikuwa waziri wa 10 wa Serikali kuanguka kwenye kura hizo.
Dk. Kamani ameanguka katika kura hizo baada ya kupata kura 11,829 dhidi ya 13,048 alizopata Dk. Raphael Chegeni.
Akitangaza matokeo hayo hivi karibuni katika ofisi ya CCM Wilaya ya Busega, eneo la Nyagh’anga, Kata ya Nyashimo, Katibu wa Jumuia ya Wazazi Wilaya ya Busega, William Bandeke, alisema idadi ya wapiga kura walikuwa 28,157.
Bandeke alisema kati ya wapiga kura hao, kura 454 ziliharibika na kura halali zilikuwa 27,700 ambapo Dk. Chegeni alipata kura 13,038 na kumzidi Dk. Kamani kwa tofauti ya kura 1,109 akifuatiwa na Kibese Bernard aliyepata kura 2,174.
Akizungumza baada ya kutangazwa mshindi, Dk. Chegeni alisema ushindi huo umeonesha namna wananchi wa Busega walitaka kudhulumiwa haki yao.
“Mimi niseme tu kwamba katika mchakato wowote kuna kashikashi nyingi, lakini nasikitika kusema kwamba ndani ya chama chetu kuna watu na mgombea mwenzetu waliamua kuchakachua matokeo,” alikaririwa akisema Dk. Chegeni.
Kilolo
Kwa mujibu kikao cha Kamati Kuu ya CCM mchakato wa kura za maoni katika Jimbo la Kilolo lililopo mkoani Iringa unatakiwa pia kurudiwa.
Katika mchakato uliofanyika awali, Venance Mwamoto alipata kura 11,200 wakati Profesa Peter Msolla akipata kura 10, 014 ambapo aligomea kusaini matokeo.
Akitangaza matokeo hayo usiku, Katibu wa CCM Wilaya ya Kilolo, Clemence Mponzi alisema katika uchaguzi huo uliokuwa na wagombea 15, Mwamoto ni mshindi.
Kuhusu Profesa Msolla kugomea matokeo, Katibu wa CCM Mkoa wa Iringa, Hassan Mtenga alikaririwa akisema kitendo hicho hakizuii vikao vya kamati ya CCM ngazi ya mkoa na wilaya kufanyika na kwamba matokeo hayawezi kubadilishwa wala uchaguzi kurudiwa.
Rufiji
Jimbo la Rufiji nalo liligubikwa na utata mkubwa katika kura hizo za maoni ambako kamati hiyo imetengua matokeo na kuamuru urudiwe.
Matokeo katika jimbo hilo yaligubikwa na utata na kulazimu Kamati ya Maadili na Usalama ya CCM Wilaya Rufiji kukutana na iliridhia na kupitisha matokeo ya kura hizo kwa mbunge wa jimbo hilo anayemaliza muda wake, Dk. Seif Rashid kupata kura 3,831.
Mgombea aliyefuatia kwa karibu katika matokeo hayo alikuwa Mohamed Omary Mchengelwa aliyepata kura 3,560.
Matokeo yalilazimika kutolewa na kamati hiyo kutokana na kuwepo utata mkubwa uliosababisha Katibu wa Wilaya ya Rufiji, Mussa Lwalilo kushindwa kuyatangaza.
Kutokana na hali hiyo, kamati ilikusanya upya matokeo yote katika kata 13 za jimbo hilo ambazo ni Mgomba, Ikwiriri, Umwe, Mohoro, Chumbi, Mwaseni, Kipugira, Ngorogo, Mkongo, Utete, Mbwara, ChemChem na Ngarambe ili kujiridhisha.
Akitangaza matokeo hivi karibuni, Katibu Mwenezi wa Wilaya ya Rufiji, Mussa Mnyeresi alisema kamati hiyo ilibaini udanganyifu mkubwa uliofanywa na watumishi wa chama hicho.
Wagombea wengine waliojitokeza katika mchakato huo ni Kamanda Jamali Rwambow, Shaban Matwebe, Dk. Seif Hassan Sule, Juma Kiobebele, Mohamed Afif na Tano Mwela.
Makete
Kamati Kuu ya CCM imefuta pia matokeo ya kura za maoni katika Jimbo la Makete. Katika mchakato huo, Dk. Norman Sigala aliibuka mshindi na kumbwaga Dk. Binilith Mahenge.
Ukonga
Katika hatua nyingine, Kamati Kuu imetengua matokeo ya Jimbo la Ukonga lililopo Manispaa ya Ilala jijini Dar es Salaam baada ya kutoridhishwa na namna mchakato huo ulivyofanyika.
Katika mchakato huo, Meya wa Manispaa ya Ilala, Jerry Silaa aibuka kwa kupata kura 10,000, Ramesh Patel 7,356 na Robert Masegese kura 548.
Mchakato wa kura za maoni kwa CCM ulifanyika kuanzia Agosti Mosi, na kuacha majeraha kwa viongozi wa juu baada ya kuanguka licha ya kuwa na nafasi nyeti serikalini.
Mawaziri
Mawaziri ambao walianguka katika mchakato huo ni Waziri wa Mambo ya Ndani ya Nchi, Mathias Chikawe wa Jimbo la Nachingwea aliyepata kura 5, 128 na Hassan Masala kupata kura 6,494.
Mbali na Chikawe, yumo Waziri wa Kazi na Ajira, Gaudentia Kabaka na manaibu mawaziri. Manaibu walionguka ni Naibu Waziri wa Mambo ya Nje na Ushirikiano wa Kimataifa, Mahadhi Juma Maalim, Naibu Waziri wa Mambo ya Ndani, Perera Ame Silima na Naibu Waziri wa Maji, Amos Makalla.
Wengine ni Naibu wa Maendeleo ya Mifugo na Uvuvi, Saningio Ole Telele, Naibu Waziri wa Kazi na Ajira, Dk. Makongoro Mahanga, Naibu Waziri wa Fedha, Adam Malima, Naibu Waziri wa Maendeleo, Jinsia na Watoto, Dk. Pindi Chana.
Mahadhi alianguka Jimbo la Paje, Zanzibar kwa kupata kura 1,785 huku Jaffar Sanya ambaye ni mjumbe wa Halmashauri Kuu Mkoa wa Kusini akiibuka mshindi wa kura 3,368. Silima alyepata kura 1, 218 Jimbo la Chumbuni alibwagwa na mpinzani wake, Ussi Pondeza kura 1,952.
0 comments:
Post a Comment