Yanga wababe Mbeya.

TIMU ya Yanga ya Dar es Salaam imezidi kuzitambia timu za Mkoa wa Mbeya, baada ya kuibuka na ushindi wa mabao 3-2, katika mechi ya kirafiki kujiandaa na Ligi Kuu Tanzania Bara iliyopigwa kwenye Uwanja wa Kumbukumbu ya Sokoine jijini Mbeya.
Yanga ambayo michezo ya awali ilizifunga Kimondo kutoka Mbozi kwa mabao 4-1, kisha Tanzania Prisoni mabao 2-0, wakati jana iliibamiza Mbeya City mabao 3-2.
Katika mchezo huo, Mbeya City ilikuwa ya kwanza kujipatia bao lililofungwa na Bakari Mwijuma, baada ya kumzidi akili mlinda mlango wa Yanga, Ally Mustapha na kuzitikisa nyavu dakika ya nane.
Yanga ambayo ilijaza viungo wengi, ilijibu mashambulizi yaliyoiwezesha kusawazisha bao hilo lililofungwa na Andrey Coutinho, dakika ya 17.
Amis Tambwe aliwainua mashabiki wa Yanga kwa kuandika bao la pili dakika ya 45, akitumia vizuri mpira wa krosi uliopigwa na Donald Ngomana kuunganisha kwa kichwa na kuwa bao.
Yanga ilikianza kipindi cha pili kwa kulisakama lango la wapinzani wao, dakika ya 49, Mzimbabwe Donald Ngoma aliwainua mashabiki wao kwa kufunga bao la tatu baada ya kutokea piga nikupige langoni mwa Mbeya City.
Mchezaji aliyetokea benchi, Meshaki Abel, aliiandikia timu ya Mbeya City bao la pili dakika ya 90, baada ya kuwazidi ujanja mabeki wa Yanga na kuachia shuti kali lililomshinda kudaka kipa wa Yanga, Mustapha.
Yanga iliwatoa Vicent Bisou, Thaban Kamuoko, Simon Msuva, Amis Tambwe, Donald Ngoma na Andrey Coutinho na kuwaingiza Mbuyu Twite, Deus Kaseke, Malimi Bisungu, Said Juma, Godfrey Mwashiuya na Mateo Antony.
Kwa upande wa Mbeya City, iliwatoa John Kabanda, Hassan Mwasapili, Steven Mazanda, Hassan Seleman, Bakari Mwijuma na Joseph Mahundi na kuwaingiza Salvatory Nkulula, David Lukoku, Hamad Omary, Richard Peter, Meshack Samwel, Geophrey Mlawa na Hamad Kibopile.

Share on Google Plus

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.