HAMISI Kiiza atuma salamu kwa Yanga baada ya kuifungia Simba mabao matatu.

HAMISI Kiiza jana alituma salamu kwa Yanga baada ya kuifungia Simba mabao matatu katika ushindi wa 3-1 dhidi ya Kagera Sugar kwenye mechi ya Ligi Kuu iliyochezwa Uwanja wa Taifa Dar es Salaam. Hizo ni salamu kwa Yanga kupitia mchezaji wake huyo wa zamani kwani watani hao wa jadi Jumamosi watamenyana kwenye uwanja huo.

Yanga juzi iliifunga JKT Ruvu mabao 4-1 na kufikisha pointi tisa, sawa na Simba zikiwa zimetofautiana uwiano wa mabao. Mechi hiyo ilianza kwa kushambuliana kwa zamu na Kiiza alianza kuliona lango la Kagera Sugar katika dakika ya 30 baada ya kuunganisha mpira wa kichwa wa Simon Sserunkuma.

Bao hilo liliichanganya Kagera na kufanya mabadiliko ya haraka kwa kumtoa Laurence Mugia na kumuingiza Babuu Ally, lakini hali haikuwa shwari na kwenda mapumziko ikiwa nyuma kwa bao 1-0.

Kipindi cha pili kilianza kwa kasi na iliichukua Simba dakika sita tu kuandika bao la pili likifungwa na Kiiza tena kwa kichwa akiunganisha mpira wa adhabu uliopigwa na Said Ndemla. Dakika nne baadaye Kagera ilipata bao lake la kufutia machozi likifungwa na Mbaraka Yusuph aliyewapiga chenga mabeki wa Simba na kufunga kirahisi.

Baada ya bao hilo, kocha wa Simba Dylan Kerr alifanya mabadiliko ya harakaharaka kwa kumtoa Sserunkuma, Emery Nibomana na Ibrahim Ajibu na kuwaingiza Pape Ndow, Hassan Ramadhan na Mwinyi Kazimoto.

Huku mashabiki waliofurika uwanjani hapo wakiamini matokeo yangekuwa 2-1, dakika ya 90 Kiiza aliwainua tena mashabiki wa Simba kwa kufunga bao la tatu akiunganisha pasi ya Kazimoto.

Katika matokeo mengine jana, Azam ilishinda bao 1-0 ugenini dhidi ya Mwadui kwenye uwanja wa Mwadui Shinyanga na Coastal Union ikiwa ugenini uwanja wa CCM Kirumba Mwanza ililazimisha sare ya bila kufungana dhidi ya Toto African.

Nayo Mtibwa Sugar iliendelea kung’ara baada ya kuifunga Ndanda 2-1 kwenye uwanja wa Manungu. Kikosi cha Simba jana: Peter Manyika, Emery Nimubona/Hassan Kessy, Mohammed Hussein, Hassan Isihaka, Justuce Majabvi, Awadh Juma, Simon Sserunkuma/Pape Ndow, Said Ndemla, Ibrahim Hajib/ Mwinyi Kazimoto, Hamisi Kiiza na Peter Mwalyanzi.

Kagera Sugar: Agathon Anthony, Salum Kanoni, Said Hassan/ Abubakar Mtiro, Ibrahim Job, Deogratius Julius, George Kavilla, Iddi Kurachi/Kenneth Masumbuko, Lawrence Mugia/Babuu Ally, Mbaraka Yussuf, Daudi Jumanne na Paul Ngalyoma.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.