Mungu awalaze pema waliofariki katika mkanyagano Hijja Makkah.

Kuna taarifa za kusikitisha kuwa mahujaji watano kutoka Tanzania ni miongoni mwa waliofariki katika tukio la mkanyagano kwenye Mji Mtakatifu wa Makka, nchini Saudi Arabia.

Kwa ujumla, watu 717 wameripotiwa kufa na wengine zaidi ya 800 kujeruhiwa katika tukio hilo.

Taarifa iliyotolewa na Wizara ya Mambo ya Nje na Ushirikiano wa Kimataifa jana ilieleza kuwa Watanzania hao walifariki wakati wakiendelea na ibada ya Hijja kwenye eneo la Mina, ndani ya Mji Mtakatifu wa Makka.

Hakika, huu ni msiba mkubwa. Sisi tunaungana na Watanzania wengine kuwapa pole wafiwa na pia kuwatakia kheri wote waliojeruhiwa ili wapate nafuu haraka.

Ni imani yetu kuwa serikali yetu, kwa kushirikiana na Saudi Arabia, itaendelea kufanya kila linalowezekana ili taarifa kamili ziendelee kupatikana kuhusiana hatima ya mahujaji wetu. Taarifa zilizopo ni kwamba mwaka huu, Watanzania takriban 2,700 wamekwenda kutekeleza ibada hiyo muhimu kwa kila Muislamu mwenye uwezo. Mbali na kwenda kuhiji Makka, nguzo nyingine kati ya tano za Uislamu ni kutoa shahada, kusimamisha swala, kutoa zaka na kufunga (swaumu) Ramadhani.

Sisi tunaamini kuwa muhimu zaidi kwa sasa ni kwa kila mmoja kuendelea kuwaombea mahujaji wetu waliosalimika ili mwishowe warejee nchini wakiwa bukheri wa afya.

Aidha, ni muhimu pia kuendelea kumuomba Mwenyezi Mungu ili awajaalie pepo yenye daraja ya juu mahujaji wetu waliopatwa na umauti, hasa kwa kutambua kuwa kilichowapeleka Makka siyo kitu kingine bali ni kujinyenyekeza mbele za Allah (Mwenye Mungu) ili mwishowe wapate radhi zake.

Katika kipindi hiki, ni imani yetu kuwa ndugu, jamaa na marafiki wa marehemu watajitahidi kuwa na subira kadiri wawezavyo. Ni kwa sababu, kwa mujibu wa mafundisho, kila nafsi itaonja umauti. Na hili lililotokea ni sehemu ya mtihani ambao siri ya kufaulu kwake kwategemea kiwango cha subira kwa kila mmoja wao.

Pamoja na yote, tunaamini kuwa baada ya shughuli za uokoaji na mazishi kukamilika, serikali ya Saudi Arabia itahakikisha kuwa uchunguzi wa kina unafanyika ili mwishowe kubaini chanzo cha mkanyagano na kuchukua hatua sahihi za kuzuia majanga ya aina hii.

Kinachotakiwa kuangaliwa na waandaaji ni taratibu za kutoa fursa kwa kila hujaji kutekeleza ibada ya Hijja akiwa salama. Rekodi zinaonyesha kuwa vifo vya aina hii vimewahi pia kutokea mara kadhaa hapo kabla katika tukio hilo linalokutanisha watu wengi zaidi kwa wakati mmoja duniani, huku mwaka huu likihusisha mahujaji takriban milioni mbili.

Kwa mfano, mwaka 1990 walikufa mahujaji 1,426, mwaka 1994 (watu 270) na pia mwaka 2006 walikufa watu 360. Hali hii inapaswa kuzuiwa kwa kupitia upya taratibu za kuwezesha waumini kutekeleza ibada hii muhimu kwa kila Muislamu mwenye uwezo.

Mungu awalaze pema peponi mahujaji wote waliotangulia mbele ya haki.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.