Sote tunaelewa kuwa taifa bila hisabati hakuna maendeleo ya sayansi na teknolojia, hivyo kuna kila sababu ya somo hili kupewa kipaumbele.
Wataalamu wa Hisabati wamekuwa wakieleza kuwa mtu anayepuuza Hisabati ni mtu wa maajabu na hushindwa kumudu hata matumizi ya kawaida.
Chama cha Hisabati Tanzania (Chahita) ni moja ya wadau ambao wamekuwa wakifanya jitihada, katika kuhakikisha Hisabati inapewa kipaumbele na kupata mafanikio makubwa katika nchi.
Mwenyekiti wa Chahita), Dk Silvester Rugeihyamu, anasema kuwa pamoja na juhudi za kuboresha ufundishaji na ujifunzaji wa hisabati bado ufaulu wa somo hilo ni wa kusuasua.
“Ufaulu wa Somo la Hisabati bado ni wa kususasua sana, hivyo tunaiomba Serikali itoe umuhimu kwa somo hili, kutokana na kwamba ndio nguzo ya masomo yote, na bila hisabati hakuna maisha ya sayansi na teknolojia,” anasema.
Chama hiki kilianzishwa mwaka 1996 kwa malengo mbalimbali na moja ya majukumu yake ni kuandaa na kuchapisha machapisho mbalimbali ya hisabati, ikiwa ni pamoja na vitabu vya ziada na kiada kwa shule za msingi, sekondari na vyuo vya ualimu.
Jukumu lingine ni kuandaa mashindano katika somo la hisabati ya kila mwaka, pamoja na kuendesha na kuratibu semina za hisabati na mikutano, kwa ngazi ya wilaya, mkoa, kanda na kitaifa.
Anasema semina kwa walimu wa hisabati zina lengo la kuwaweka pamoja walimu wa somo hilo, ili kuweza kuelimishana katika mada zilizongumu kwenye eneo la ufundishaji na ujifunzaji.
Anasema Chahita inatambua wazi kuwa, matatizo mengi ya hisabati yanaanzia katika elimu ya msingi, hivyo kuna haja ya viongozi wa ngazi husika, kuhamasishwa ili kusukuma walimu kuhudhuria kwenye semina ambazo zimekuwa zikitolewa na chama hicho.
‘Ruhusa na ufadhili kwa walimu wa shule za msingi katika kuhudhuria semina za mafunzo ni shida, na bila walimu wa shule za msingi, kuimarishwa, tutakuwa tunafanya kazi bure,” anasema.
Anasema Chama cha Hisabati, kimekuwa kikishirikiana na serikali katika mipango mbalimbali kwa lengo la kuinua hisabati, lakini yapo mambo ambayo wamekuwa wakiyapinga, ikiwa ni moja ya jitihada za kuboresha somo hilo.
Pia, anasema moja ya mambo ambayo wamekuwa wakipingana na serikali ni mfumo wa kuchagua jibu sahihi katika mtihani wa darasa la saba kwa somo la hisabati.
“Chahita kilikataa mfumo wa kuchagua jibu sahihi katika mtihani wa darasa la saba kwa somo la hisabati, na tulipeleka malalamiko yetu Baraza la Mitihani Tanzania (Necta), ambapo walitujibu kuwa mfumo wa Multiple Choice unafaa.
“Baada ya majibu haya ya Necta, sisi hatukukubaliana nao na Juni mwaka huu, tulikata rufaa Wizara ya Elimu na kwa sasa tunasubiri majibu.
“Tunasubiri majibu, lakini hatuelewi Wizara ya Elimu ikiwa kama Necta, tutakata rufaa wapi, kwani malengo yetu ni kuona hisabati inaboreshwa na kiwango cha ufaulu kwa somo hili kinapanda,” anasema.
Anasema suala la kuweka hisabati katika mfumo wa kuchagua jibu sahihi chama hakikuhusishwa, licha ya kuwa wao ndio wataalamu wa hisabati.
Akizungumza Katibu wa Chama cha Walimu Tanzania (CWT) Mkoa wa Kilimanjaro, Ally Mmbaga, anasema, mfumo wa kuchagua jibu sahihi si mfumo mzuri, hasa kwa somo la hisabati, kutokana na kwamba ikitokea mwanafunzi akaamua kucheza na herufi, anaweza kufaulu vizuri, ilihali hajui chochote.
“Mfumo huu unaweza kusababisha mwanafunzi akafaulu vizuri sana na ukaona ni mwanafunzi bora kumbe amecheza tu na herufi na hata hawezi kuonesha njia ya kazi yake, tunapaswa kuondoa mfumo huu,” anasema Mmbaga.
Anasema serikali inapaswa kubadilisha mfumo wa kuchagua majibu sahihi na kuhakikisha wanafunzi, wanaonesha njia za maswali watakayofanya badala ya kuweka herufi ya jibu sahihi pekee.
Pia, anasema kwenye mitihani ya darasa la kwanza hadi la sita hakuna mfumo wa kuchagua herufi ya jibu sahihi katika mitihani, lakini jambo la kushangaza katika mtihani wa taifa kumewekwa mfumo huo jambo ambalo si sahihi.
“Kimsingi ni kwamba, Serikali inapaswa kubadili mfumo huu wa kuchagua herufi ya jibu sahihi katika mitihani ya kuhitimu elimu ya msingi kwa somo la hisabati, na kuwataka wanafunzi waoneshe njia, kwani hata ikitokea mwanafunzi ameibia jibu kwa mwenzake, hataweza kupata maksi zote kwenye hilo swali kwa sababu atakosea kuonesha njia aliyofanya kupata jibu hilo.
“Ipo hatari kubwa ya kuchagua jibu sahihi hasa katika somo la hisabati ambalo ni muhimu sana, kwani akipiga kengeza anaweza kupata jibu sahihi, hivyo ni vyema serikali ikaondoa mfumo huu,” anaeleza.
Kwa upande wake, Katibu Mkuu Ofisi ya Waziri Mkuu, Tawala za Mikoa na Serikali za Mitaa (Tamisemi), Jumanne Sagini, anasema wizara inatambua kwamba hisabati ni somo lenye changamoto nyingi katika ufundishaji na ujifunzaji katika ngazi zote za elimu.
“Ufaulu wa Somo la Hisabati katika ngazi za elimu ya msingi na sekondari katika Taifa letu kwa kipindi kirefu umekuwa na changamoto nyingi,” anasema.
Anasema wastani wa waliofaulu katika miaka saba iliyopita kwenye mtihani wa hisabati kitaifa shule za msingi ni 28.1 huku katika shule za sekondari ikiwa wastani wa 18.1.
Aidha, anasema hali hiyo haiwezi kuachwa iendelee, hivyo ni jukumu la wadau wote wa elimu nchini, kuunganisha nguvu zao, ili kuweza kubadilisha hali hiyo.
“Ujenzi wa Taifa lenye uchumi imara, na maendeleo ya sayansi na teknolojia hauwezi kufikiwa kama ufaulu wa somo la hisabati, utakuwa chini, kwani hisabati ni msingi wa maendeleo kwa maeneo mengi kama vile uchukuzi, mawasiliano, ufundi, ujenzi, viwanda, fedha, madini, kilimo, maji, takwimu, sayansi na teknolojia.
Anaongeza kuwa “Tukumbuke kuwa ufaulu katika hisabati, huathiri upatikanaji wa wanaojiunga katika vyuo vikuu na vyuo vingine, vinavyotoa elimu katika ngazi ya stashahada kwa masomo ya sayansi na hisabati,” anasema.
Anasema ni vyema kila mdau akashiriki, kikamilifu kwa nafasi yake katika harakati za kuinua ufaulu wa somo la hisabati katika ngazi zote za elimu.
Anatumia pia nafasi hiyo, kuwataka walimu wa hisabati nchini, kuchunguza kwa kina sababu ambazo zinafanya somo la hisabati kutopendwa na wanafunzi wengi.
“Naomba mtafakari ni kwa namna gani ninyi kama wataalamu wa hisabati, mtaboresha ufundishaji na ujifunzaji, hasa katika mazingira ya ndani ya darasa, ili kuwezesha ufaulu wa somo hili kupanda,” anasema.
Anasema kuna haja ya kuangaliwa matumizi ya Tehama katika kurahisisha ufundishaji wa hisabati shuleni hatua ambayo itasaidia kuleta mvuto wa aina yake kwa wanafunzi kujifunza hisabati hata wakiwa peke yao.
Aidha, anaeleza kuwa ufundishaji bora wa somo la hisabati, unapaswa kutumia vifaa vya kutosha katika mazingira halisi, ili matumizi ya hisabati yaweze kuwa bayana zaidi kwa wanafunzi.
Anasema kuna haja sasa ya walimu wa hisabati kutumia mazingira halisi ya shule, katika ufundishaji, na utoaji mifano ya matumizi ya hisabati, kama vile vifaa vya kiteknolojia ya kisasa na vitu mbalimbali vinavyotumia dhana ya hisabati katika matumizi au uundwaji wake.
0 comments:
Post a Comment