Akizungumza na gazeti hili jana, Kiula alisema Lowassa hakuwa na sababu ya kutoa kauli hiyo inayojenga chuki miongoni mwa watu walioathiriwa na vitendo vya watu waliopo gerezani.
Lowassa ambaye anawania urais kupitia Umoja wa Katiba ya Wananchi (Ukawa), amesema endapo Watanzania watamchagua kuwa Rais katika Uchaguzi Mkuu wa mwaka huu, atatumia taratibu za utawala bora kuhakikisha anawatoa gerezani mwanamuzi maarufu nchini, Nguza Viking maarufu kwa jina la Babu Seya, pamoja na wanawe waliofungwa kifungo cha muda mrefu kwa makosa ya kunajisi watoto.
“Mimi nafahamu sheria kidogo na usisahau pia nimewahi kuwa waziri katika Wizara ya Mambo ya Ndani. Utaratibu ulivyo ni kwamba Mahakama ikishatoa hukumu, utaratibu unaofuata ni rufaa. Huo ndio utawala wa sheria. Rais wa nchi anaweza kutoa msamaha kwa wafungwa kwa kufuata utaratibu maalumu, tena kwa baadhi ya makosa, na hili la ubakaji halimo,” alisema Kiula.
Kiula ambaye aliwahi pia kuwa Waziri wa Ujenzi katika Serikali ya Rais Ali Hassan Mwinyi, alisema ni vema wanasiasa wakazungumzia mambo ya msingi yanayolikabili Taifa hivi sasa, badala ya mambo madogomadogo ambayo taratibu zake za kuyatatua zinafahamika na hazina matatizo.
Akizungumza mchakato wa kampeni za uchaguzi mkuu unaoendelea hivi sasa, Kiula alikosoa pia utaratibu wa wagombea kutoa hotuba kwa kusoma kwenye makaratasi au kuwataka watu wasome kwenye tovuti badala ya kueleza waliyonayo vichwani mwao ili kudhihirisha kuwa wanakijua wanachokizungumzia kwa wananchi.
Mmoja wa wanasheria maarufu aliyezungumza na gazeti hili kwa masharti ya kutotajwa jina akisema ataingizwa kwenye siasa, alisema kauli za Lowassa kwenye uzinduzi wa kampeni zinashtusha na kushangazana kueleza kuwa waziri mkuu huyo wa zamani haelewi maana ya dhana ya utawala wa sheria na inaonesha ana viashiria vya udikteta.
Msomi huyo alisema Lowassa ameonesha kuwa ni mtu anayefuata upepo na anayeweza kufanya maamuzi kwa shinikizo la watu.
“Hili la kutaka kumwachia Babu Seya na wale masheikh wa kundi la Uamsho kutoka Zanzibar amelitoa baada ya kushinikizwa na watu waliokuwa wanamsikiliza wakati wa uzinduzi wa kampeni, na pale alipokuwa anawatembelea wananchi wa kawaida kwenye mitaa ya Jiji la Dar es Salaam,” alifafanua.
Alisema kama Lowassa angekuwa mtu makini na anayewajali wanyonge, kama anavyodai, basi angezungumzia kuunda tume itakayochunguza matatizo ya watu mbalimbali waliopo magerezani badala ya kuwazungumzia wahalifu wachache wenye umaarufu kwa lengo la kuwavutia wapiga kura.
Akizungumzia suala hilohilo, Mwenyekiti wa Chama Cha Kijamii (CCK), Constantine Akitanda, alisema kwa kauli ya kutaka kuwaachia watuhumiwa wa Uamsho wanaodaiwa kusababisha uvunjifu mkubwa wa amani Zanzibar, Lowassa amedhihirisha kuwa akiingia madarakani atasababisha mfarakano mkubwa zaidi kwenye jamii.
Amesema hali ya amani imerejea Zanzibar na sasa wananchi wanafanya shughuli zao za maendeleo bila hofu ya vitendo vya kigaidi kama ilivyokuwa awali.
Mmoja wa Watanzania maarufu katika mtandao wa twitter, Maria Sarungi, alibandika katika ukurasa wako huo maneno yafuatayo; “kama vyombo vya habari vya Tanzania vingekuwa kama vya Marekani, kichwa cha habari kutoka mkutano wa Jangwani vingesema; “mgombea urais atangaza kuwasamehe wabakaji.”
Sitta
Siku chache baada ya mgombea urais wa Chadema na Umoja wa Katiba ya Wananchi (Ukawa), Edward Lowassa kusema ataboresha sekta ya mawasiliano nchini, ikiwemo reli ya kati, Waziri wa Uchukuzi, Samuel Sitta amejibu mapigo dhidi ya mgombea huyo.
Lowassa alitoa kauli hiyo katika viwanja vya Jangwani, Dar es Salaam wakati wa uzinduzi wa kampeni ya chama hicho na kusisitiza kuwa akifanikiwa kuingia madarakani atafufua Shirika la Ndege Tanzania (ATC).
Kutokana na kauli hiyo, Waziri Sitta alikutana na waandishi wa habari jana na kubainisha kuwa Lowassa anazungumza mambo ambayo hayajui na kwamba ujenzi wa reli ya kati unaendelea na upo katika hatua nzuri.
Akifafanua kuhusu ujenzi wa reli hiyo, Sita alisema ujenzi upo katika hatua nzuri na Septemba 15, mwaka huu Rais Jakaya Kikwete anatarajia kuweka jiwe la msingi katika reli hiyo iliyojengwa na Kampuni ya Ujenzi wa reli ya China (CRCC) na Kampuni ya Ujenzi na Uhandisi wa Majengo ya China Civil Engineering Construction Corporation (CCECC).
Alisema reli hiyo inajengwa kwa mkataba wa sh. trilioni 16 ambazo ni sawa na sh. bilion 7.6 mapato ambayo yanapatikana Mamlaka ya Mapato Tanzania (TRA), kwa mwaka.
Sitta alisema wanatarajia kutumia reli hiyo kwani tayari wametiliana saini pamoja na nchi za Burundi, Rwanda na Uganda huku akibainisha kuwa endapo itakuwa imekamilika na nchi hizo zikaanza kupitisha mizigo ndani ya miaka minne hali ya uchumi itabadilika.
Akizungumzia suala la Air Tanzania alisema Serikali inaendelea kukamilisha taratibu za kuchukua madeni na kwamba wameingia mkataba na Benki ya TIB ili iweze kuwakopesha fedha za kununua ndege nne ambazo zitasaidia kurudisha Air Tanzania.
“Tuna imani kubwa kabla ya Oktoba mwaka huu tutakuwa tumenunua ndege hizo nne, sasa tuna ndege moja ambayo haiwezi ikafanya kazi zote,” alisema.
Kuhusu suala la ATC, Lowassa alisema atahakikisha anafufua shirika hilo kwani ni aibu kuzidiwa na nchi ndogo kama Kenya na Rwanda huku akiweka bayana kuwa hakuna sababu ya kushindwa.
Mbatia
Kwa upande wao, Ukawa, umesema taarifa zinazosambazwa katika mitandao na baadhi ya vyombo vya habari kuhusu mgombea wao wa urais kupitia Chama cha Demokrasia na Maendeleo (Chadema), Edward Lowassa kuwa alisema atawaachia masheikh na Nguza Vicking (Babu Seya) akifanikiwa kuwa rais si za kweli.
Kauli hiyo ilitolewa na Mwenyekiti Mwenza wa Ukawa ambaye pia ni Mwenyekiti wa Chama cha NCCR-Mageuzi, James Mbatia jana wakati akizungumza na waandishi wa habari jijini Dar es Salaam.
Mbatia alisema watu wanapotosha alichosema Lowassa kwa makusudi katika kutimiza malengo yao ya kisiasa huku wakitumia nguzo ya dini kama njia ya kutetea maovu yao.
Mwenyekiti Mwenza huyo alisema Lowassa alitoa kauli hiyo baada ya viongozi wa Ukawa kukaa na kujadili malalamiko mengi ambayo wananchi walionesha kuhitaji ufumbuzi mojawapo ikiwa ni kufungwa kwa Babu Seya na masheikh.
Alisema walijadiliana na kuona kuwa suala hilo linahitaji kupewa nafasi iwapo watapata nafasi ya kushinda katika uchaguzi kwa kufuata misingi ya utawala bora, sheria na kanuni za nchi na si vinginevyo.
“Inasikitisha sana kuona viongozi wetu wa vyama wanaamua kupotosha umma kuhusu kauli ya Lowassa kushughulikia tatizo la wafungwa ambao wanaonekana kufungwa kwao kuna maswali mengi, ila jambo la kushangaza ni udini nao unahusishwa ni aibu na hii haikubaliki,” alisema.
Alisema suala hilo lisipewe nafasi katika jamii kwani athari yake inaweza kuwa mbaya tofauti na watu wanavyofikiria ambapo mawazo yao yanaelekezwa Ikulu na si haki za binadamu.
Mbatia alisema iwapo kutakuwepo na mazingira ya ukiukwaji wa haki za binadamu ni wajibu kuangalia njia ya kutatua matatizo yaliyopo kwa utaratibu sahihi ambazo zitamtendea haki kila mtu.
Alisema ni jambo la aibu kufananisha ugaidi na imani za dini kwani ni wazi kuwa wanaofanya ugaidi si kwamba wanasimamia misingi ya dini zao ila mahitaji yao binafsi.
“Nadhani tunafanya mzaha na hizi kauli lakini vyanzo vya mifarakano katika nchi ni kauli za viongozi ambao hutumia majukwaa vibaya kupotosha umma wakiamini kuwa hiyo ndiyo njia ya wao kufanikiwa kisiasa,” alisema.
Mwenyekiti huyo wa NCCR-Mageuzi, alisema katika kuonesha kuwa upotoshaji huo umepangwa ndiyo maana Tume ya Taifa ya Uchaguzi (NEC), inashindwa kuchukua hatua jambo ambalo linasababisha vyama kutokuwa na imani nayo.
Pia, aliweka bayana kuwa Jeshi la Polisi linashiriki kuwepo na muendelezo wa kauli hizo za kupotosha na kulitaka lichukue hatua stahiki kwa faida ya nchi na wananachi.
Dk. Kahangwa
Akizungumzia upotoshaji huo, Mratibu wa Kamepeni za Ukawa Taifa, Dk George Kahangwa alisema kimsingi kinachoonekana kwa sasa ni siasa za Tanzania kuonekana kutokidhi mahitaji sahihi.
Dk. Kahangwa alisema vyama vinashindwa kutoa sera kwa wananchi na kinyume chake vinatumia muda mrefu kutukanana jambo ambalo linaenda kinyume cha hitaji la wananchi.
“Kinachoondelea ni kuonesha kuwa siasa za Tanzania bado hazijakidhi mahitaji ya wananchi na hao ambao wanatumiwa pia wana dalili za kutojitambua ndiyo maana mtu anadiriki kutukana akiona ndiyo anafanya kampeni, kampeni sahihi inahitaji sera na mipango yautekelezaji si matusi,” alisema.
0 comments:
Post a Comment