Kwa mujibu wa Prof. Mbarawa Watanzania wanatakiwa kuwa makini na matumizi ya mitandao ya kijamii ili kuepukana na adhabu kali za sheria hiyo.
Prof. Mbarawa alisema Sheria ya Makosa ya Mitandao ya mwaka 2015 imeanisha makosa na adhabu za uhalifu wa mitandao na kwamba itasaidia kuzuia wizi wa fedha mitandaoni, picha chafu na ujumbe wenye matusi.
Waziri huyo amekaririwa pia akisema Serikali baada ya kujiridhisha kuwa maandalizi yote muhimu ikiwemo elimu kwa umma na kujenga uelewa yamefanyika, ni wakati muafaka kwa sheria hiyo kuanza kutekelezwa.
Ujio wa sheria hiyo kwa kiwango fulani unalenga kuhakikisha mitandao ya kijamii na vyombo vingine vya utoaji habari kwa umma vinafanya kazi kwa umakini na kuzingatia miiko inayotakiwa. Ni jambo jema kwa sababu baadhi ya mitandao inatumika vibaya tofauti na malengo yaliyokusudiwa.
Hata hivyo, hatuoni kama kweli wananchi wameelimishwa vya kutosha kuhusu sheria hiyo kama Prof Mbarawa anavyosema kwa sababu haikutungwa muda mrefu. Kwa msingi huo kuna kila sababu ya kuendelea kuelimisha umma kuhusu sheria husika.
Kama sheria hiyo imetungwa kwa lengo kuzua utumiaji mbaya wa mitandao sawa, lakini adhabu zilizopo na faini zinakatisha tamaa hususan katika ujenzi wa demokrasia hasa kwa nchi changa kama zetu ambazo mifumo ya uwajibikaji si mizuri kwa kiwango cha kutia matumaini.
Kwa msingi huo kama wadau wataona sheria hiyo ni kitanzi katika uhuru wa watu kutoa maoni, ni muhimu kwa wabunge kuipitia upya kwa lengo la kutoa usawa kwa watumiaji wake ili kuendelea kurutubisha uhuru wa watu kujieleza au kutoa hisia zao.
Vinginevyo tunaamini kwa upande mwingine sheria hiyo itaziba nyufa ambazo zilianza kuonekana hususan katika suala zima la mmomonyoko wa maadili. Chini ya sheria hiyo tunaamini utu na thamani ya kila mwananchi itaheshimiwa badala ya kudhalilishwa kwa njia za mitandao.
0 comments:
Post a Comment