Kikwete akabidhi rasmi urais kwa Dk Magufuli.

RAIS wa Serikali ya Awamu ya Nne, Jakaya Kikwete amekabidhi rasmi madaraka ya urais, kwa Rais wa Awamu ya Tano ya Jamhuri ya Muungano wa Tanzania, Dk John Magufuli ambaye anakuwa Rais wa Serikali ya Awamu ya Tano baada ya kuapishwa rasmi kushika wadhifa huo.

Katika sherehe za kuapishwa kwa Rais wa Tanzania zilizofanyika kwenye Uwanja wa Uhuru, Dar es Salaam jana, Kikwete aliwasili hapo saa 4.23 asubuhi akiwa kwenye gari la wazi, huku akisindikizwa na pikipiki 12 za askari wa Kikosi cha Usalama Barabarani, alizunguka uwanja huo huku akiwapungia wananchi mkono na kuwaaga.

Baada ya kukamilisha mzunguko huo ambao ulizua hamasa na nderemo kutoka kwa wananchi waliohudhuria sherehe hizo, Rais Kikwete alikwenda moja kwa moja kwenye jukwaa la saluti, ambako alipokea salamu ya heshima na kupigiwa mizinga 21 iliyoambatana na Wimbo wa Taifa.

Aidha, baada ya tukio hilo, gwaride la kijeshi lililokuwapo uwanjani hapo, lilijipanga katika umbo la Omega, ambalo ni herufi ya mwisho ya Kigiriki ikiwa na maana ya mwisho.

Gwaride hilo likiwa katika umbo hilo, Rais aliyemaliza muda wake, alilikagua na kisha kurejea kwenye jukwaa la saluti ambako alipokea tena salamu ya heshima na bendera ya Rais kushushwa, ikiwa ni ishara ya kuvua madaraka na kumaliza muda wake wa uongozi kama Rais wa Serikali ya Awamu ya Nne.

Pia, baada ya tukio hilo la bendera kushushwa, Rais huyo aliaga rasmi kwa kuvua madaraka yake ambapo alitoka uwanjani hapo saa 4.50 kupitia gari la wazi na kutoka nje ya uwanja huku akiwapungia mkono wa kwa heri wananchi waliohudhuria uwanjani hapo.

Alirejea baadaye kupitia mlango wa chini ya jukwaa kuu. Katika hali isiyo ya kawaida, wengi wa wageni waliohudhuria sherehe hizo, walionekana kuguswa na tukio hilo la Rais Kikwete kuaga kwani pamoja na kumpungia mkono, baadhi yao walionekana wakifuta machozi, ishara ya huzuni ya kumuaga Rais waliyemzoea na kumkaribisha Rais mpya, Dk Magufuli.

Aliporejea jukwaani, alisalimiana na wageni mbalimbali na alipomfikia mkewe Mama Salma Kikwete, alimkumbatia na kwa pamoja waliwapungia mkono wa kwa heri, wananchi na viongozi waliokuwepo uwanjani hapo, na baadaye aliketi kiti cha pembeni ya Rais mpya, Dk Magufuli.

Baada ya sherehe, Kikwete aliondoka uwanjani hapo akitanguliwa na Rais mpya Dk Magufuli, na kabla ya kuingia ndani ya gari lake, alitumia fursa hiyo, tena kuwapungia na kuwaaga wageni na wananchi waliokuwepo uwanjani ambao walimshangilia na kumpungia pia mkono.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.