MSHAMBULIAJI wa kimataifa wa Yanga, Donald Ngoma amnanga Maguri.

MSHAMBULIAJI wa kimataifa wa Yanga, Donald Ngoma, amesema bado hajaona mpinzani wa kumzuia ashindwe kubeba tuzo ya Mfungaji Bora msimu huu baada ya kuizoea Ligi ya Tanzania Bara kwa muda mfupi tangu ajiunge na timu hiyo.

Mshambuliaji wa Stand United Elias Maguri, anaongoza mbio za ufungaji bora kwa sasa akifunga mabao tisa huku Ngoma na Hamisi Kiiza wa Simba wakiwa nafasi ya pili kila mmoja akiifungia timu yake mabao nane.

Ngoma ameeleza kuwa ametoa kauli hiyo kwa sababu tayari amerudi kwenye kiwango chake alichokizoea, hivyo hafikirii kupata upinzani utakaomfanya ashindwe kutimiza lengo alilojiwekea.

“Sihofu kuwa nyuma kwa bao moja kwa sababu ligi bado ni ndefu na kizuri ni kwamba tayari nimeizoea Ligi Kuu ya Tanzania najua nifanyeje ili niweze kuipatia timu yangu ushindi,” alisema Ngoma.

Mzimbabwe huyo alisema anataka kuutumia msimu wake huu wa kwanza kuweka rekodi ya kuwa mfungaji bora kwa kuwa anajua siku zijazo atakuwa na wakati mgumu, zaidi ilivyokuwa wakati anatua kwenye Yanga kwa sababu mabeki wengi watakuwa wanajua madhara yake.

Alisema mbali na ubingwa, lakini pia atafurahi kuona Yanga inabeba ubingwa wa Tanzania Bara, katika msimu wake wa kwanza akiwa na klabu hiyo kongwe nchini.

Ngoma ametua Yanga kwa mkataba wa miaka miwili akitokea FC Platinum ya Zimbabwe, na amejenga ushirikiano mzuri na mshambuliaji mwenzake Amissi Tambwe katika kuifungia Yanga mabao.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.