Mwambusi: Hakuna wa kuizuia Yanga.

LICHA ya kuachwa nyuma kwa pointi mbili na vinara Azam FC katika msimamo wa Ligi Kuu ya Tanzania Bara, Kocha msaidizi wa Yanga, Juma Mwambusi, amesema licha ya ushindani mkubwa katika ligi, ana uhakika watatetea ubingwa wao msimu huu.
Aidha, ametamba kutokana na maandalizi bora wanayoendelea nayo, haoni kama kuna timu yenye jeuri ya kuizuia Yanga kutimiza dhamira yake. Mwambusi, kocha wa zamani wa Mbeya City, alisema kikosi chao kimekamilika katika kila idara na hadhani kama kuna timu itakayowasumbua.
“Ukweli ni kwamba Yanga imetimia kwa sababu imekusanya kundi la wachezaji wenye vipaji na ndio maana nasema sijui kama kuna timu ambayo inaweza kutufunga…timu iko vizuri na maendeleo ya maandalizi ni mazuri mno,” alisema Mwambusi.
Kocha huyo alisema ingawa ni muda mfupi tangu ajiunge na timu hiyo akiwa msaidizi wa kocha raia wa Uholanzi, Hans van der Pluijm, lakini ametambua uimara wa timu hiyo na kudai inastahili ubingwa wa Tanzania msimu huu.
Alisema anatambua ushindani uliopo kwenye ligi ya msimu huu, lakini hajaona timu inayoweza kuizuia Yanga kutwaa tena ubingwa. “Nimekuwa kocha wa timu mbalimbali za Ligi Kuu ya Tanzania Bara, lakini kipindi chote hicho sijawahi kuona Yanga bora kama ya msimu huu, ina nyota wengi wenye vipaji halisi vya soka.
Sioni cha kuizuia Yanga kutwaa ubingwa,” alisema Mwambusi. Yanga inashika nafasi ya pili kwenye msimamo wa Ligi Kuu ikiwa na pointi 23 huku Azam FC wakiwa ndiyo vinara kwa kujikusanyia pointi 25, timu zote zikiwa zimecheza michezo tisa na ndizo pekee katika ligi hiyo ambazo hazijapoteza mchezo.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.