Tunapenda kuwapongeza wadau wote walioshiriki kufanikisha mradi huu hadi kufikia hatua hii ya uhalisia wa kuanza kazi. Hakuna ubishi kwamba mradi huu ni faraja kubwa kwa wakazi wa Dar es Salaam kutokana na ukweli kwamba kwa muda mrefu, wamekuwa wakikabiliana na msongamano na foleni kubwa ya vyombo vya usafiri wakati wa kwenda na kurudi katika shughuli zao mbalimbali jijini.
Kuna kila aina ya matumaini kwamba kupatikana kwa usafiri wa DART, kutupunguza kwa kiasi kikubwa kero ya usafiri, msongamano na foleni kwa wakazi wa jiji na hivyo kuwarahisishia kufika kwa wakati katika maeneo yao mbalimbali ya kazi na shughuli nyingine za kijamii.
Miundombinu ya barabara za DART na mabasi yenyewe ni ya kisasa, kiasi kwamba abiria wanahitaji kujifunza masuala muhimu na ya msingi katika kupata huduma hiyo kwa urahisi na kwa uhakika zaidi.
Hapa tunapenda kumuunga mkono Mkuu wa Mkoa wa Dar es Salaam, Paul Makonda kwa kuongeza muda wa kutoa elimu kwa abiria wa mabasi hayo hadi Jumapili, kwa abiria kupanda bure kwa lengo la kujifunza.
Awali muda huo wa mafunzo kwa abiria ulikuwa ni siku mbili na ungemalizika jana. Tunapenda kutoa wito kwa abiria, watembea kwa miguu na watumiaji wengine wa vyombo vya usafiri ikiwa ni pamoja na magari madogo, bajaji, bodaboda, guta na baiskeli kuheshimu sheria za barabarani na pia kutoingilia barabara ya mabasi ya mwendo wa haraka ili yaweze kufanya kazi zake kwa ufanisi kama ilivyokusudiwa.
Tayari viongozi wetu mbalimbali wakiwemo, Waziri Mkuu, Kassim Majaliwa, Mkuu wa Mkoa wa Dar es Salaam, Makonda na Kamanda wa Kikosi cha Usalama Barabarani, Mohamed Mpinga wameshalisemea suala la vyombo vingine vya usafiri kuheshimu sheria za barabarani na kwamba barabara ya mabasi yaendayo kasi ni kwa ajili ya mabasi hayo tu.
Katika hili tunawaomba wananchi pamoja na watumiaji wa vyombo vingine vya usafiri, wajifunze na kuheshimu barabara hizo ili nia njema ya mradi huo wa DART isivurugwe na wachache, wasiotaka kufuata sheria za usalama barabarani na kutufikisha kwenye mikasa ya ajali kwa uzembe wao wa makusudi wa kutofuata sheria.
Katika hili tunaomba wananchi wote na wenye vyombo vingine vya usafiri, tubadilike kwa kujifunza utamaduni wa kutii sheria bila shuruti ili tuweze kufurahia huduma hiyo mpya na ya kisasa ya usafiri wa mabasi ya haraka.
Tunapenda pia kusisitiza kwamba vyombo vyenye dhamana ya usalama barabarani, hususan Kikosi cha Usalama Barabarani chini ya uongozi wa Mpinga, wawachukulie hatua zinazostahili wote watakaokuwa wanakiuka utaratibu wa kuheshimu sheria za usalama barabarani, ikiwa ni pamoja na kufikishwa mahakamani kupata adhabu wanayostahili bila kufanya ajizi.
Lakini, hatua pia zichukuliwe dhidi ya wale watakaojaribu kuharibu miundombinu ya DART na mabasi yake. Katika hili, wananchi wote kwa ujumla wao, kila mmoja awe mlinzi wa mali hizo kwa kuripoti katika vyombo husika, watakaojaribu kuharibu miundombinu hiyo muhimu.
0 comments:
Post a Comment