Basi hilo lenye namba za usajili T909 BXK aina ya Yutong, lilipata ajali saa 5.20 asubuhi katika kijiji cha Tabu Hoteli, kata ya Chakwale, wilaya ya Gairo katika barabara kuu ya Morogoro- Dodoma.
Miongoni mwa waliofariki kutokana na ajali hiyo ni watu wazima watatu, wakiwamo wanawake wawili na wanaume watatu ambao pia wamo watoto wadogo wawili. Kaimu Kamanda wa Polisi wa Mkoa wa Morogoro, Leonce Rwegasira alithibitisha ajali hiyo na kueleza kuwa basi hilo lilikuwa katika mwendo kasi na liliacha njia ya kupinduka.
Aliitaja baadhi ya miili iliyotambuliwa ni Salmin Shaaban mtoto mwenye umri wa miezi sita, mkazi wa Urambo na Clement Mpondi umri wa miaka 40 hadi 50. Kaimu Kamanda Rwegasira alitaja miili ambayo haijatambuliwa ni ya wanawake wawili mmoja anayekadiriwa kufikia umri wa miaka 60-65 na mwingine umri kati ya miaka 20-25.
Alisema mwanamke huyo mwenye umri unaokadiriwa kuwa wa miaka 20-25, alikutwa akiwa amemkumbatia mwanawe wa kiume anayekadiriwa kuwa na umri wa miezi minne hadi tisa, pia alifariki dunia.
Alisema kati ya majeruhi hao, saba hali zao zilikuwa mbaya na walipekekwa katika Hospitali ya Rufaa ya Mkoa wa Morogoro kwa ajili ya matibabu zaidi na wengine walitibiwa na kuruhusiwa.
Alisema majeruhi waliotibiwa na kuruhusiwa na abiria wengine walikuwa wakifanyiwa mipango na kampuni hiyo kupata usafiri mwingine kwa ajili ya kuendelea na safari yao kwenda Tabora.
Pia alisema maiti waliotambuliwa na wasiotambuliwa, wamehifadhiwa katika chumba cha kuhifadhi maiti cha Hospitali ya Rufaa ya Mkoa wa Morogoro kwa ajili ya kusubiri ndugu kutambuliwa na wengine kuchukuliwa.
Pamoja na hayo, alisema idadi kamili ya abiria waliokuwamo katika basi hilo haikujulikana kutokana na fomu ya orodha ya majina ya abiria waliokuwa wamekatiwa tiketi kutoonekana, huku dereva na kondakta wake wakitoweka eneo hilo na kutokomea kusikojulikana.
0 comments:
Post a Comment