Kampuni nyingine zilizokumbwa na hatua hiyo ya kulinda mali na usalama wa raia ni pamoja na Super Sami na Otta High Class. Wakati mabasi ya City Boy yakifungiwa kutokana na ajali ya mabasi yake mawili kugongana yakiwa safarini kwa uzembe wa madareva Jumanne wiki hii na kupoteza maisha ya abiria wapatao 30 na kujeruhi watu wapatao 48, mabasi ya Super Sami na Otta nayo katika kipindi cha wiki moja zilihusika katika ajali tatu ambazo pia zilipoteza maisha ya watu 46 na majeruhi 73.
Inasikitisha kuona mwenendo huu ukizidi kuota mizizi na kuwafanya Watanzania kuanza kuzoea kusikia juu ya mabasi yetu ya abiria yakisababisha ajali na kupoteza maisha ya watu na majeruhi karibu kila kukicha.
Sisi tunapenda kutoa pongezi kwa wenzetu wa Usalama Barabarani na SUMATRA kwa kuchukua hatua za kuzifungia kampuni hizo na wahusika, kwa maana ya madereva, ili nao wafikishwe kwenye vyombo vya sheria waweze kupata wanachostahili kutokana na uzembe wa kuchezea maisha ya abiria.
Tungependa kuvikumbusha pia vyombo vya dola kufikiria upya juu ya suala zima la utoaji leseni kwa madereva wa mabasi ya abiria na hata namna ya upatikanaji wa madereva husika ili kujiridhisha na ubora wa kazi zao, umri wa kuwajibika ipasavyo wawapo safarini badala la kujitwika viroba na pombe nyingine wakiwa kazini lakini pia kuwepo na madereva wa kupokezana kwa wale wanaosafiri umbali mrefu.
Tunapenda kusisitiza kwamba, kwa jambo hili hakuna njia ya mkato lazima wadau katika sekta hiyo ya usafiri wakiwemo wamiliki mabasi, Usalama Barabarani, SUMATRA na hata wananchi wa kawaida kwa maana ya abiria, nao washirikishwe katika kutafuta njia bora ya kupata suluhu ya ajali za barabarani.
Hakuna ubishi kwamba, hivi sasa tunatengeneza yatima, wajane, wagani na vilema wengi ambao kwa kila hali, jamii nzima inatugusa kutokana na ukweli kwamba waliokuwa na baba, mama na jamaa zao sasa wako katika shida kubwa, kisa ni uzembe wa madereva wasiotaka kusikia ya wataalamu wa sheria na taratibu ambazo wanazihamu fika.
Ni kweli kwamba ajali haina kinga, lakini ni ukweli pia kwamba mabasi yanayokwenda zaidi ya kasi ya mwendo wa kilometa 80 kwa saa yapo katika hatari kubwa zaidi ya kupata ajali kuliko ambayo madereva wake wanazingatia mwendo huo pamoja na alama za barabara.
Udhibiti wa uhai wetu tukiwa barabarani uko katika mikono ya madereva wetu na abiria wenyewe. Upo uwezekano wa kusafiri na kuwa salama kama kila mmoja wetu atachukua hatua pale panapohitajika kumripoti dereva anayeendesha kwa mwendo wa kifo kwa kupiga simu polisi ili hatua zichukuliwe dhidi ya dereva husika. Hivi tutaendelea kulia hadi lini? Haitusaidii ni lazima tuchukue hatua dhidi ya kadhia hii ya ajali.
0 comments:
Post a Comment