Waziri huyo akiwa nchini pia alifanya mazungumzo na Serikali ya Awamu ya Tano ya Rais John Magufuli. Katika mazungumzo yake na Dk Mahiga, Waziri huyo alisema uhusiano kati ya Ufaransa na Tanzania uliodumu kwa muda mrefu utaendelea kuimarishwa.
Aidha Ayrault aliipongeza Tanzania kwa kuendelea kupigania amani na usalama katika bara la Afrika na hasa juhudi zake za mara kwa mara za kuhakikisha kunapatikana suluhu kwa migogoro ya nchi za Maziwa Makuu.
Aliipongeza Tanzania kwa kukubali kupokea maelfu ya wakimbizi kutoka Burundi na kuwahifadhi na pia mchango wake katika kukabiliana na ugaidi duniani.
Mawaziri hao pia walitambua mchango wa AFD ambayo ipo chini ya Wizara ya Mambo ya Nje na Maendeleo ya Kimataifa ya Ufaransa kwa kutoa mikopo kwa Tanzania inayolenga kuendeleza sekta mkakati za nishati, maji, usafi na usafirishaji.
Waziri Ayrault katika ziara yake hiyo alikutana na Rais mstaafu wa Awamu ya Tatu, Benjamin Mkapa, ambaye ni msuluhishi wa mgogoro wa Burundi.
Katika mazungumzo yake alimpongeza msuluhishi huyo kwa juhudi zake za kutaka pande zinazokinzana nchini humo kufikia muafaka kwa mujibu wa makubaliano ya Arusha.
Aidha alisema taifa lake lipo bega kwa bega naye katika kuhakikisha kwamba mgogoro wa Burundi unamalizika. Waziri Ayrault pia alikutana na wawakilishi wa kampuni za Ufaransa zinazofanya shughuli mbalimbali nchini Tanzania na kuwasisitizia kwamba uwekezaji wanaoufanya una maana kubwa kwa Tanzania hasa katika kuwezesha upatikanaji wa nafasi za kazi.
Aidha alisema kwa uwekezaji huo na kuambukiza utaalamu na teknolojia katika sekta mkakati za maendeleo kama uhandisi, maji, fedha na mawasiliano, kutakuza zaidi ushirikiano wa Tanzania na Ufaransa katika masuala ya kiuchumi.
Waziri Ayrault alimaliza ziara yake kwa kuzuru Bandari ya Dar es Salaam ambayo ni lango kubwa la uchumi kwa Tanzania na nchi jirani.
0 comments:
Post a Comment