Marekebisho ya sheria za kupunguza msongamano gerezani yafanyike haraka.

MWISHONI mwa wiki, Waziri wa Sheria na Katiba, Dk Harrison Mwakyembe ameuhakikishia umma wa Tanzania kupitia vyombo vya habari kwamba wizara yake inaweka mkakati wa kupunguza msongamano gerezani kwa kurekebisha sheria zinazowafunga watu waliotenda makosa madogo. Sisi tunaunga mkono kauli hiyo aliyoitoa Waziri Mwakyembe wakati akizungumza na Jaji Mkuu wa Australia Kusini, Chris Kourakis aliyetembelea nchini na kujadiliana na watendaji wa idara ya mahakama kushirikiana katika mambo mbalimbali, yakiwamo ya kufanya marejeo ya sheria mbalimbali, ikiwamo ya adhabu ya kifungo cha chini na kutoa mafunzo na kuwajengea uwezo watumishi wa mahakama.
Katibu Mkuu Wizara ya Sheria na Katiba, Profesa Sifuni Mchome anasema urekebishaji wa sheria hiyo utawasaidia mahakimu kutoa adhabu ya kifungo cha chini cha adhabu hiyo, jambo ambalo litapunguza vifungo kwa wafungwa, hivyo kuondoa msongamano gerezeni.
Ukweli ni kwamba, kumekuwapo na utitiri wa mashauri ya kesi ndogo ambayo yamejaza watuhumiwa wengi gerezani na kesi zao nyingi zinachelewa kumalizika mapema, kunakochangia kuongeza msongamano gerezani.
Kurekebisha sheria za mashauri ya kesi ndogo kwa ushirikiano na huduma nyingine, kutapunguza msongamano na gharama za kuwatunza wafungwa hao gerezani. Mwenyekiti wa Bodi ya Parole, Augustine Mrema anasema nusu ya wafungwa waliopo kwenye magereza yaliyoanzishwa rasmi mwaka 1931 na wakoloni, wametengenezewa kesi na wenye fedha, kutokana na baadhi ya askari ambao wasio waaminifu wamekuwa wakicheza ‘dili’ na kuwatia hatiani watu wasiohusika na wengine wapo kutokana na kesi ndogo.
Mrema ameweka mkakati wa kuhakikisha ifikapo Desemba mwaka huu, atakuwa amepunguza wafungwa 10,000 gerezani, jambo ambalo litasaidia kupunguza idadi ya wafungwa na kuondoa msongamano gerezani. Lakini pia wakitokea wasamaria wengi kama Mchungaji Getrude Lwakatare, watachangia kupunguza msongamano wa wafungwa gerezani.
Mchungaji huyo ametumia Sh milioni 25 kuwalipia wafungwa 50 wa awamu ya kwanza na awamu ya pili 28, faini walizokuwa wakidaiwa kutokana na kutenda makosa madogo ya faini ya pungufu ya Sh milioni moja. Mchungaji amepunguza msongamano wa wafungwa. Njia nyingine za kupunguza ni kuachiwa kwa masharti, kupewa muda wa matazamio kwa kupewa kifungo cha nje, kutoa huduma kwa jamii na parole.
Njia zote hizo zikitumika huku Wizara ya Sheria na Katiba ikairejea na kuirekebisha sheria za mashauri ya kesi ndogo, hakika msongamano wa wafungwa gerezani utakuwa historia au tutabaki na wafungwa 21,000 ambao ndio uwezo wa magereza yote nchini.
Hakika, msongamano wa wafungwa utapungua kwa kasi zaidi, kuliko idadi aliyoisema Naibu Waziri wa Mambo ya Ndani ya Nchi, Hamad Yusuf Masauni, Septemba 8, mwaka huu, bungeni Dodoma kwamba wafungwa wamepungua kutoka 38,000 hadi 34, 000 kutokana na kupewa adhabu mbadala ya parole.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.