Akizungumza na wananchi eneo la Masamvu, mkoani Morogoro akiwa njiani kuelekea Dodoma mwishoni mwa wiki, Makamu wa Rais, Samia Suluhu Hassan alitamka wazi kwamba serikali haipendi kuona mauaji ya wakulima na wafugaji yakiendelea kutokea nchini na hasa katika mkoa wa Morogoro.
Katika kukabiliana na changamoto hiyo aliwakumbusha wafugaji kutii sheria namba 12 ya mwaka 2010 iliyotungwa na Bunge kwa mifugo yao kutambuliwa na kupigwa chapa kwa mujibu wa sheria.
Lengo la sheria hiyo pamoja na mambo mengine ni kusaidia katika utatuzi wa migogoro pindi inapotokea.
Sisi tunaunga mkono mwito wa Makamu wa Rais Samia wa kuwataka wafugaji na wakulima wapendane na kuheshimiana bila kusahau kwamba pale panapotokea kutoelewana basi masuala yao yashughulikiwe kwa njia ya busara bila kugombana kiasi cha kusababisha madhara makubwa kama vifo na uharibifu wa mali.
Hapa tungependa kutoa msisitizo maalumu kwa viongozi wetu wa serikali katika ngazi za vijiji,vitongoji,kata, wilaya na halmashauri kuchukua majukumu yao katika uhalisia na stahiki zinazotakiwa bila kupendelea upande wowote ili kudhibiti migogoro hiyo kama siyo kuimaliza kabisa.
Kwa wafugaji na wakulima pia kwa upande wao nao wawe tayari kwa makusudi kushirikiana na viongozi hao wa serikali na siasa ili kukabiliana na changamoto hiyo katika uhalisia wake badala ya kutumia mbinu ambazo kwa muda mrefu sasa hakuna aliyeibuka mshindi nje ya kuendelea kuathirika kwa kupoteza wapendwa wetu na mali zetu.
Serikali ya Awamu ya Tano ina lengo kulifikisha taifa letu katika uchumi wa kati ikiwa ni pamoja na kukuza na kujenga viwanda zaidi ili watu wetu waweze kujipatia ajira na bidhaa kwa lengo la kujiletea maendeleo endelevu katika nyanja zote za kiuchumi,kisiasa,kijamii na kiutamaduni.
Hakuna ubishi kwamba malengo hayo muhimu katika sekta hizo mbili za kilimo na mifugo hayataweza kufikiwa na kutuletea tija na matunda tunayokusudia kama hakutakuwepo amani, utulivu na mshikamano. Hapa tungependa kuwakumbusha wenzetu wakulima na wafugaji wawe na dhamira ya dhati ya kudhibiti kama sio kumaliza kabisha migogoro baina yao.
Pande zote mbili, tunarudia kuwakumbusha kwamba waketi pamoja kwa kushirikiana na viongozi wao ili kuweka mikakati ya uhakika ya kulikabili tatizo hilo ambalo ni kero kwa pande zote mbili na uwezo wa kulidhibiti limo katika mikono yao kwa kufanya majadiliano hadi kufikia muafaka kuondoa tofauti zao ili kujiletea maendeleo endelevu.
Wakumbuke kwamba penye vurugu, mapigano na migogoro hapana maendeleo.
Tulikatae hili kwa vitendo.
0 comments:
Post a Comment