Marekani yaendelea kutoa shinikizo la kijeshi kwa Syria

Waziri wa mambo ya nje wa Marekani Bw John Kerry ameonya kuwa tishio la kuishambulia Syria bado lipo licha ya kufikiwa kwa makubaliano ya kuharibu silaha za kemikali kati ya Marekani na Russia.

Wakati huo huo, katibu mkuu wa Umoja wa Mataifa Ban Ki Moon anatarajiwa kutoa maelezo mbele ya baraza la usalama la umoja huo baada ya kupotea ripoti ya matokeo ya uchunguzi wa silaha za kemikali nchini Syria.

Bw Kerry ametoa kauli hiyo baada ya kukutana na waziri mkuu wa Israel Bw Benjamin Netanyahu mjini Jerusalem kumweleza kuhusu makubaliano kati ya Marekani na Russia, na kumhakikisha Bw Netanyahu kuwa rais Bashar al-Assad amekubali kutoa orodha ya silaha za kemikali za Syria ndani ya wiki moja.

Bw Netanyahu amesema Syria inatakiwa kunyang'anywa silaha zote za kemikali ili kuifanya kanda hiyo iwe ya salama.

Mjini Damascus, wakati huohuo, Waziri wa habari wa Syria Omran al-Zoubi amesisitiza kuwa Syria iko makini katika kuondoa silaha za kemikali.

Bw Al-Zoubi amesema nchi yake imeanza kuandaa orodha ya silaha hizo na kuongeza kuwa Syria itatekeleza makubaliano hayo pindi yatakapoanza kufanya kazi kwa kuheshimu azimio la baraza la usalama.

Bw Al-Zoubi amesema nchi yake itasaidia kufanikisha kazi wachunguzi wa umoja huo watakapoingia nchini humo mwezi Novemba mwaka huu.

Akizungumza akiwa nchini China, Mfalme wa Jordan Abdullah wa pili wa Jordan amesema hofu yao ilikuwa ni silaha hizo za kemikali kuingia mikononi mwa watu wabaya.

Mfalme Abadullah amesisitiza kuwa wataongeza juhudi za kufikia makubaliano kati ya umoja wa nchi za kiarabu na jumuiya ya kimataifa ili kufikia suluhisho la kisiasa katika mgogoro wa Syria, na hatimaye kumaliza tishio la silaha za kemikali, mapambano na vurugu nchini Syria.

Msemaji wa Umoja wa Mataifa amesema ripoti ya wachunguzi imewekwa kwenye tovuti za idara ya kuteketeza silaha hatari ya umoja huo.

Wakati huo huo, raia wa Syria wamepongeza makubaliano yaliyofikiwa kati ya Russia na Marekani. Kiongozi wa kamati ya mambo ya nje ya bunge la Syria Fadia Deeb, anatoa wito wa suluhisho la kisiasa haraka iwezekanavyo ili kumaliza vita vya wenyewe kwa wenyewe nchini humo.

"Hali ya Syria inahitaji suluhisho la kisiasa na pande zote zinatakiwa kuhimiza utaratibu wa kufikia suluhisho la kisiasa, kwa sababu njia ya ghasia au ya kijeshi haitasaidia kuleta suluhisho la kisiasa, bali itavuruga hali ya kanda nzima na maslahi yake.

Katika makubaliano hayo, natumai kuwa pande zote zimeridhika na hatua hiyo ya usuluhishi".

Waziri wa maridhiano ya kitaifa wa Syria Bw Ali Haidar amesema makubaliano hayo kama ushindi kwa Syria.

Makubaliano ya kuteketeza silaha za kemikali za Syria pia yanatoa uwezekano wa kukwamua mazungumzo ya amani kwa ajili ya kumaliza vita vya wenyewe kwa wenyewe nchini humo.

Zaidi ya watu laki 1 wameuawa na wengine milioni mbili kuwa wakimbizi tangu mgogoro wa huo uanze miaka miwili iliyopita.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.