Serikali yazidi kupuuza ushauri wa TPSF

Wakati Taasisi ya Sekta Binafsi Tanzania (TPSF) ikiishauri kuharakisha sera ya gesi badala ya ugawaji wa vitalu, serikali imeendelea kupuuza ushauri huo na sasa kupitia Shirika la Maendeleo ya Petroli Tanzania (TPDC) imetangaza rasmi kuharakisha suala hilo kwa madai ya kuwahi ushindani wa masoko ulimwenguni.

  TPSF kupitia Mwenyekiti wake, Dk. Reginald Mengi, na Mkurugenzi Mtendaji wake, Godfrey Simbeye, wiki iliyopita walitoa tamko la pamoja wakisema kama ugawaji wa vitalu utafanyika Oktoba, mwaka huu, kama ilivyopangwa, Watanzania hawatakuwa na fursa ya kumiliki rasilimali yao.

  Lakini pamoja na ushauri huo, jana Mwenyekiti wa Bodi ya TPDC, Michael Mwenda, aliwaambia waandishi wa habari, jijini Dar es Salaam jana kuwa kwa sasa hivi ulimwenguni kuna ushindani wa kuwahi masoko ya gesi.  

Hivyo, akasema endapo kama masoko yatafurika kabla ya kuyawahi, inawezekana kulazimika kuuza gesi kwa bei ya chini sana ama kushindwa kuendeleza kabisa gesi iliyogunduliwa.

  “Mfano halisi ni gesi ya Songosongo, ambayo siku za nyuma haikuweza kupata soko na hivyo kubaki ardhini kwa miaka 30 kabla ya kuanza kutumika,” alisema Mwenda.  

Kutokana na hilo, alisema kuongeza hazina za gesi kwa kuendelea kutafuta, kutajenga imani kwa wawekezaji hasa kwa kuwa mikataba ya gesi huwa inakuwa ya muda mrefu kutokana na uwekezaji wake, ambao hutumia mitaji mikubwa.  

Alisema kwa sasa Msumbiji wameshaongeza hazina yao ya gesi iliyopo ardhini kufikia takriban 200 TCF wakati hazina ya gesi ya Tanzania iliyopo ardhini ni takriban 43 TCF na kusema mwekezaji atavutiwa zaidi kuwekeza pale ambako hazina ya gesi ni kubwa.

  “Kwa kuzingatia haya ni muhimu kwa Taifa letu kuendeleza mchakato wa kutoa vitalu ili shughuli za utafutaji ziendelee na ikiwezekana ugunduzi wa mafuta ufanyike na au hazina ya gesi iongezeke.

Kuongezeka kwa hazina ya gesi kuvutiwa zaidi wawekezaji na kutapunguza gharama za utafutaji na uzalishaji siku za baadaye,

” alisema Mwenda.  Alisema kwa sasa serikali inatarajia kutoa vitalu vingine saba baharini; pia eneo la Ziwa Tanganyika Kaskazini katika duru ya nne itakayozinduliwa Oktoba 25, mwaka huu.  

Kuhusu ushiriki wa wazawa, Mwenda alisema wanaweza kushiriki kwa kutoa huduma muhimu na usambazaji wa bidhaa zinazohitajika na zinazotumika katika utekelezaji wa shughuli za utafutaji na uchimbaji.  

Alisema katika nchi nyingine, wananchi huhusika katika kununua hisa za kampuni zinazofanya kazi katika masoko ya mitaji kwa kutegemea kama kampuni itafanya vizuri na kufanya ugunduzi, hivyo hisa za wawekezaji kuongezeka thamani.  

Mwenda alisema uwekezaji katika miradi ya utafutaji wa mafuta na gesi unahitaji kiasi kikubwa cha fedha huku kukiwa hakuna uhakika wa mrejesho wa uwekezaji huo.  

Alisema kuchimba kisima kimoja katika maeneo ya nchi kavu inagharimu takriban dola za Marekani milioni 40 (Sh. bilioni 64) na katika maeneo ya kina kirefu cha bahari kisima kimoja kinagharimu takriban dola za Marekani milioni 120 (Sh. bilioni 190) na kwamba, kwa kawaida ni lazima visima kadhaa vichimbwe kabla ya kuanza uzalishaji. 

NIPASHE.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.