Moat yatuma timu bungeni kupinga muswada wa habari

Dar es Salaam.

Chama cha Wamiliki wa vyombo vya Habari Tanzania (Moat) kimeunda timu maalumu itakayokwenda bungeni Dodoma kuwashawishi wabunge wasiupitishe muswada wa sheria wa vyombo vya habari baada ya kubaini umejaa kasoro.

Muswada huo ulioandaliwa na Serikali na ulitakiwa kuwasilishwa katika kikao kilichopita kwa hati ya dharura jambo ambalo halikuwezekana baada ya kupingwa na wadau na baadhi ya wabunge.

Hata hivyo, muswada huo uliorejeshwa kwa wadau kujadiliwa, unatarajiwa kupelekwa kwa mara nyingine katika kikao cha Bajeti kinachoendelea ingawa si kawaida kwa Bunge la Bajeti kujadili miswada ya sheria.

Akizungumza na waandishi wa habari Dar es Salaam jana, Mwenyekiti wa Moat, Reginald Mengi (pichani) alisema baada ya kuusoma, wamegundua kuwa kuna kasoro nyingi na miongoni mwake ni adhabu kwa waandishi wa habari ambazo zitawafanya wawe waoga katika kufanya kazi yao.

Alisema wadau wa habari na wataalamu wa sekta hiyo wataendelea kuwaelewesha wabunge juu ya masuala mbalimbali yaliyomo katika muswada huo ili hata wanapoupitia wawe na uelewa wa kutosha wa kitu wanachotaka kukipitisha kuwa sheria rasmi.

Alisema licha ya kasoro hizo, pia kuna hila za kuupitisha kwa haraka kusudi wasitoe mawazo yao juu ya vipengele kadhaa ambavyo vinafinya uhuru wa vyombo vya habari na hata uhuru wa wananchi kupata habari.

“Wanasiasa hawa walitumia sana vyombo vyetu vya habari wakati wakitafuta kura na sasa wameshapata uongozi wanatuona hatufai badala yake wanataka kutukandamiza kwa kutuwekea sheria nzito,” alisema Mengi.

“Huu muswada ukipita, utakuwa ni sheria mbovu ambayo haina manufaa kwa nchi yetu, pia Watanzania watakosa habari za uhakika kwani ikiwa kila ufikapo muda wa taarifa ya habari saa 2.00 usiku wote wanalazimika kutazama Televisheni ya Taifa, sasa hii ndiyo nini?” alihoji.

Mkurugenzi Mtendaji wa Mwananchi Communications Ltd, Francis Nanai alisema ni vyema magazeti yakatumia nafasi iliyopo kuandika makala maalumu kila siku kuhusu muswada huo ili wananchi wajue matatizo yake.

Alisema pia wamiliki na waandishi wote wa habari kwa pamoja wajiunge na wanaharakati wanaotaka kwenda mahakamani kuupinga muswada huo ambao ni aibu kwa Taifa.

“Ni vyema muswada ukafanyiwa kazi baada ya uchaguzi wa Oktoba na rais ajaye ndiye auhalalishe kwa kutia saini,” alisema.

Mkurugenzi wa Sahara Media Group, Samwel Nyala alisema suala la kulazimishwa kupeleka taarifa zao kwenye runinga ya Taifa, kila saa mbili usiku ni kuwanyima wadau wa habari haki ya upatikanaji wa habari.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.