Chaneta wapewa Sh milioni 40.

BENKI ya Convenant jana ilikabidhi tiketi, mabegi ya kusafiria na suti za michezo vyenye thamani ya Sh milioni 40 kwa Chama cha Netiboli Tanzania (Chaneta) kwa ajili ya gharama ya usafiri kwenda Botswana katika mashindano ya Afrika. Timu hiyo yenye wachezaji 17 na viongozi watatu, inaondoka nchini leo kwenda kuchuana katika mashindano hayo yatakayoanza kutimua vumbi kuanzia Jumamosi Gaborone, Botswana.
Akizungumza wakati wa kukabidhi tiketi hizo jijini Dar es Salaam jana, Mkurugenzi Mtendaji wa benki hiyo, Sabetha Mwambenja alisema kuwa, benki yake ni ya wanawake, hivyo imeamua kuwawezesha ikiamini kuwa michezo ni sehemu ya ajira.
Pia imefanya hivyo kwa kuwa timu hiyo ya Taifa Queens inaundwa na wanawake ni jambo zuri kuokoa jahazi ili kuiwezesha kwenda Botswana kushiriki mashindano hayo.
Mwenyekiti wa Chama cha Netiboli Tanzania (Chaneta), Annie Kibira alisema kuwa kambi yao waliyopiga JKT Ruvu ilihitaji kiasi cha Sh milioni 9, lakini Wizara ya Kazi, Utamaduni, Vijana na Michezo waliwapa Sh milioni 3 tu.
Naye Allen Alex aliyewakilisha wizara inayohusika na michezo aliishukuru benki hiyo kwa kubeba msalaba wa serikali wa kuvisaidia vyama.
Alisema ni jukumu la serikali kuzihudumia timu za taifa, hivyo anachukua fursa hiyo kuipongeza benki hiyo kwa kubeba jukumu hilo. Kibira aliwataja wachezaji wanaondoka leo kuwa ni Sophia Komba, Lilian Sylidian, Veronica Kubilu, Nasra Selemani, Chuki George, Joyce Boniface, Jawa Idd, Faraja Malaki, Restuta Boniface, Irine Elius na Elizabeth Fussy.
Wachezaji wengine ni Betina Kizinja, Ndigwako William, Sahriufa Mustafa, Siwa Juma na Niza Nyange wakati viongozi ni Afsa Abrahim (kocha), Hilda Mwakatobe (meneja) na Kibira (mkuu wa msafara).
Awali mashindano hayo yalipangwa kufanyika Namibia lakini yamepelekwa Botswana.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.