Sitta amevunja Bodi ya Wakurugenzi ya Mamlaka ya Usimamizi wa Bandari (TPA).

Waziri wa Uchukuzi Samuel Sitta (pichani), amevunja Bodi ya Wakurugenzi ya Mamlaka ya Usimamizi wa Bandari (TPA) iliyoundwa na mtangulizi wake, Dk. Harrison Mwakyembe, na kuunda bodi mpya yenye wajumbe wanane kuanzia Juni 2, mwaka huu.

Uteuzi huo umefanyika kwa mujibu wa kifungu Namba 6 Kifungu kidogo cha 2 (b) cha Sheria ya Bandari namba 17 ya mwaka 2004 kinachompa mamlaka ya kuvunja na kuteua wajumbe wa bodi.

Sitta alitangaza uteuzi huo jana jijini Tanga wakati wa ziara ya kikazi katika Bandari ya Tanga na baadaye kuzungumza na wafanyakazi waliokusanyika katika uwanja wa Baraka na kusisitiza kuwa mabadiliko hayo yametokana na vitendo vya uonevu alivyokuta vikiendelea kufanywa ndani ya TPA.

Wajumbe wapya walioteuliwa ni pamoja na Mhadhiri wa Sheria katika Chuo Kikuu cha Dar es Salaam, Dk. Tulia Akson; Mhandisi wa Ujenzi, Musa Ally Nyamsingwa; Mtaalam wa Manunuzi na Mjumbe wa Bodi ya Posta, Donata Mugassa na Mkurugenzi Mkuu mstaafu wa Mamlaka ya Udhibiti wa Nishati na Maji (Ewura), Haruna Masebu.

Wengine ni Mhandisi wa Bodi ya Wahandisi Tanzania, Gema Modu; Mhadhiri Mwandamizi wa Chuo Kikuu Dar es Salaam, Francis Michael; Mkurugenzi wa Mipango NSSF, Crescentius Magori na aliyekuwa Mkurugenzi wa Masoko wa TPA, Flavian Kinunda.

Dk. Michael na Akson walikuwa wajumbe wa Bunge Maalum la Katiba, ambalo Sitta alikuwa mwenyekiti wake.

“Uteuzi huu unatengua uteuzi wa wajumbe wa sasa wa bodi hiyo kuanzia leo Juni 2, mwaka huu na lengo la uteuzi wa wajumbe hawa ni kuleta tija na ufanisi wa utendaji kazi ndani ya wa Mamlaka na kwa nafasi ya Mwenyekiti mpya wa Bodi nasubiri uteuzi wa Rais Jakaya Kikwete kwani ndiye mwenye mamlaka hiyo kisheria,” alisema.

Dk. Mwakyembe aliteua bodi ya TPA Novemba 6, 2012.

Mwakyembe aliwateua Dk. Jabir Kuwe Bakari, John Ulanga, Caroline Temu, Jaffer Machano, Dk. Hildebrand Shayo, Said Salum Sauko, Mhandisi Julius Mamiro na Asha Nasoro.

Sambamba na hatua hiyo Waziri Sitta aliziagiza taasisi zote zilizo chini ya wizara ya Uchukuzi ikiwamo Mamlaka ya Hali ya Hewa, Mamlaka ya Usimamizi wa Anga, Reli na Bandari kuhakikisha wanabuni mifumo mipya ya motisha ndani ya mamlaka zao ili wafanyakazi wa ngazi za chini wajione ni sehemu ya mamlaka husika.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.