Kwa mujibu wa taarifa iliyotolewa kwa vyombo vya habari jana na Ofisa Habari wa TFF, Baraka Kizuguto,mchezaji atakayesajiliwa awe ni wa timu za taifa za nchi yake (wakubwa, U23, U20, U19 na U17 n.k.), awe anacheza katika Ligi Kuu ya nchi yake au nchi nyingine wakati anasajiliwa.
Kizuguto alisema kila mchezaji wa kigeni atakayesajiliwa atalipia ada ya maendeleo. Mpira wa vijana ya dola 2,000 kwa kila msimu atakayocheza hapa nchini. Fedha hizi zitapelekwa katika mfuko wa maendeleo ya mpira (Football Development Fund).
"Pia imeamriwa kuwa mikataba ya klabu na wachezaji iliyo hai itaendelea kutambuliwa na TFF. Na kwa wale ambao tayari wapo nchini wataruhusiwa kuongeza mikataba yao iwapo watakubaliana na klabu zao," alisema.
Alisema kuanzia sasa mikataba kati ya wachezaji na klabu itakayotambuliwa na TFF, itakuwa ni ile ambayo ni nakala halisi zilizopigwa mhuri na lakiri ya TFF na kusajiliwa kwenye kumbukumbu ya shirikisho hilo. Klabu na mwachezaji watapewa nakala hizi baada ya kusajiliwa na TFF.
LESENI ZA MAKOCHA
Kamati ya utendaji imeamua kuwa kuanzia msimu huu, Kocha wa timu ya ligi Kuu sharti awe na leseni B ya CAF au itakayolingana nayo kutoka katika mashirikisho mengine duniani na kocha msaidizi awe na leseni C ya CAF, hii ni kwa misimu mitatu.
Kuanzia msimu wa 2018/19 kocha wa Ligi Kuu atatakiwa kuwa na leseni A ya CAF au inayolingana na hiyo kutoka katika mashirikisho mengine duniani.
Aidha, Kamati ya Utendajji ya TFF imemteua Meshack Bandawe kuwa mjumbe wa bodi ya mfuko wa maendeleo ya mpira wa miguu - TFF (FDF), Bandawe ni meneja wa PPF Kanda ya Ziwa.
0 comments:
Post a Comment