Jamani Tanesco ondoeni kero hii ya umeme.

UMEME ni nishati muhimu kwa maisha ya binadamu na kukosekana kwake huleta athari kubwa kwa wafanyabiashara wadogo na wakubwa, uzalishaji viwandani na hata kwa taasisi nyeti, kama hospitali, vyuo na shule.
Katika miaka ya karibuni, serikali imejitahidi mno kuchukua hatua mbalimbali kuboresha uzalishaji na usambazaji wa nishati hiyo ; na miaka ya karibuni serikali iliwahi kutangaza kuwa mgao wa umeme, ungekuwa jambo la kihistoria nchini. Aidha, kuna wakati serikali iliwahi kutenga kiasi cha Sh bilioni 503 ili kuondoa adha ya mgawo wa umeme.
Hatua nyingine iliyowahi kuchukuliwa na Serikali ni kupunguza gharama za kuunganisha umeme. Katika mikoa mingi gharama hizo, zilipungua hadi Sh 450,000 na katika mikoa ya Mtwara na Lindi, wananchi wanaunganishwa umeme kwa gharama nafuu ya Sh 27,000 tu.
Kwa sasa, idadi ya Watanzania waliounganishiwa huduma hiyo mijini na vijijini, imeongezeka maradufu.
Hata hivyo, kwa karibu wiki mbili sasa, limezuka tatizo la umeme kukatika mara kwa mara katika jiji la Dar es Salaam, hasa maeneo yote ya katikati ya jiji, kwa maana ya kata ya Kisutu, ambako kuna maduka makubwa na madogo, ofisi za serikali, mashirika ya kimataifa, kampuni binafsi na mashirika ya umma.
Umeme unakatwa ovyo na mara kwa mara pia katika eneo lenye heka heka nyingi za kibiashara la Kariakoo. Huduma ya umeme pia imekuwa ikikatwa mara kwa mara katika maeneo ya Temeke, Chang’ombe Magomeni, Kinondoni, Kigogo, Manzese na Ilala.
Katika jiji la Dar es Salaam, umeme umekuwa ukikatikakatika saa za kazi hadi jioni na hali ni mbaya zaidi siku za mwishoni mwa wiki, Jumamosi na Jumapili. Kutokana na kero hiyo, tunakumbusha wafanyakazi wa Shirika la Umeme Tanzania (TANESCO), kutekeleza ahadi ya serikali kwamba mgao wa umeme hautakuwepo.
Jambo lingine linalowatatiza watu hivi sasa ni kwamba kwa nini mgao huo wa mara kwa mara, hautolewi taarifa katika magazeti, redio na televisheni? Pia, kwa nini haielezwi utakwisha lini? Watendaji wa Tanesco watambue kuwa katika kipindi hiki tulichonacho sasa, kukosekana kwa huduma ya umeme, kunachochea maneno maneno yasiyokuwa na tija ya wananchi kwa serikali yao.
Kwa mfano, mgombea mmoja wa urais akihutubia jijini Mwanza mwishoni mwa wiki iliyopita, alipojaribu kueleza vipaumbele vyake vya urais atakavyovitekeleza, wananchi walipaza sauti wakimtaka aelezee atakavyomaliza kero ya umeme.
Ni dhahiri kelele hizo za wananchi wa Mwanza, zinaonesha kuwa kero ya umeme kwa sasa haipo Dar es Salaam tu, bali imesambaa hadi mikoani, kama vile Mwanza, ambalo ni jiji la kibiashara katika Kanda ya Ziwa.
Tunahimiza uongozi wa Tanesco kuondoa haraka kero hii kwa ajili ya maslahi mapana ya Taifa na Watanzania kwa ujumla. Tuna imani kama Tanesco itadhamiria, tatizo hili litapungua na baadaye kuwa historia.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.