Mliojiandikisha hakikisheni mnajitokeza kuhakikiwa na NEC.

Tume ya Taifa ya Uchaguzi (NEC) imetoa ratiba ya kuanza kwa kazi ya kuwahakiki watu wote walioandikishwa kwenye Daftari la Kudumu la Wapiga Kura kwa kutumia mfumo wa kielektroniki (BVR) kwa nia ya kuhakikisha kuwa kila mmoja anashiriki vyema upigaji kura ifikapo Oktoba 25, 2015.

Kwa mujibu wa ratiba hiyo iliyotolewa hivi karibuni, uhakiki utafanyika nchini kote, ukianzia kwenye mikoa mingine na kuhitimishwa katika jiji la Dar es Salaam.

Ili kufanikisha kazi hiyo, kila mwananchi aliyejiandikisha ametakiwa na NEC kujitokeza ili kuhakikisha kuwa taarifa zake zimechukuliwa kwa usahihi.

Sisi tunaungana na NEC katika kuwasihi wananchi wote wenye sifa kujitokeza ili kuhakiki taarifa zao na za wengine katika maeneo yao. Tunasisitiza jambo hili kutokana na ukweli kuwa hii ni hatua mojawapo muhimu kabla ya upigaji kura. Kutotekeleza jukumu hili ni sawa na kujiweka katika hatari ya kupoteza sifa za kushiriki upigaji kura ili kuwapata viongozi wa taifa hili katika kipindi kingine cha miaka mitano. Kila mwananchi mwenye sifa anatakiwa kujitokeza mapema katika siku zilizoteuliwa kwa kazi ya uhakiki.

Kwa kukumbushia, ni kwamba kazi hii ndiyo itakayomhakikishia kila mwananchi kuwa na fursa ya kushiriki uchaguzi. Ni kwa sababu kupitia kipindi hiki, ambacho kwa jiji la Dar es Salaam kitachukua siku tano kuanzia kesho (Jumamosi), kila aliyejiandikisha atakuwa na nafasi ya kupitia taarifa zake na kujiridhisha kuwa zimerekodiwa kwa usahihi. Kwa mfano, kama mtu anaitwa Mussa Ali, umri miaka 23, halafu ikaonekana kuwa taarifa zake zimekosewa kwa kuandikwa kuwa ni Ally Musa mwenye miaka 32, ni wazi kwamba atalazimika kurekebishiwa taarifa zake katika kipindi hiki. Kinyume chake, kuna hatari mtu wa aina hii akapoteza haki yake ya kupiga kura kwani taarifa atakazotoa zitatofautiana na zile zilizorekodiwa.

Kadhalika, mbali na kurekebisha taarifa binafsi za kila mmoja pindi zinapokuwa na makosa, kazi hii ya uhakiki pia inatoa fursa kwa wananchi kupinga kuandikishwa kwa watu wasiokuwa na sifa. Mathalani, ikitokea kuwa kuna raia wa kigeni wanaoishi nchini isivyo halali wamejipenyeza na kujiandikisha kama wapigakura, ni wazi kwamba wananchi watakuwa na fursa ya kupinga kitendo hicho kwa kutoa taarifa kwa maafisa uandikishaji wa NEC na mwishowe kwenye vyombo vya dola ili watu wa aina hiyo wachukuliwe hatua za kisheria.

Mbali na kudhibiti wageni, kipindi hiki kinaweza pia kutoa fursa kwa wananchi wa kila eneo kupata nafasi ya kuwabaini watu wengine wasio na sifa, wakiwamo wenye umri chini ya miaka 18, watu wasioishi kwenye maeneo yao na pia kubaini majina ya watu waliopoteza sifa baada ya kufariki dunia. Nipashe tunaamini kuwa kwa kuzingatia yote haya, wapiga kura katika kila eneo watabaki kuwa ni wale wenye sifa tu. Na hili ni muhimu kwani mwisho wa siku, wapigakura wenye sifa ndiyo watakaokuwa na nafasi ya kuchagua viongozi watakaokuwa madarakani kwa kipindi kingine cha miaka mitano. Kinyume chake, kama watu wasio na sifa wakiwamo raia wa kigeni watapata nafasi ya kupiga kura, ni wazi kwamba demokrasia itapata pigo kwani wananchi wanaweza kupata viongozi wasiowataka.

Kwa kuzingatia yote hayo, ndipo sisi tunaposisitiza kuwa sasa ni muhimu kwa kila aliyejiandikisha kushiriki kazi ya uhakiki. Hili lizingatiwe.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.