PINDA aliagiza jeshi la magereza kutumia ardhi kuongeza uzalishaji.

Waziri Mkuu, Mizengo Pinda (pichani), ameliagiza Jeshi la Magereza nchini kutumia rasilimali kubwa waliyonayo ya ardhi na watu kuongeza uzalishaji wa chakula kwa ajili ya mahitaji ya jeshi hilo na ziada kutumika kusaidia majeshi mengine nchini.

Pinda alitoa agizo hilo juzi wakati akifunga Mafunzo ya Uongozi Daraja la kwanza, kozi ya 21 kwa askari 711 wa Jeshi la Magereza yaliyomalizika katika Chuo cha Magereza Kiwira wilayani Rungwe.

Alisema kuwa Jeshi la Magereza kwa sasa linamiliki ardhi kubwa inayofaa kwa kilimo ambayo inafikia hekta 72,752, lakini eneo linalotumika kwa kilimo ni hekta 3,169 pekee.

“Ardhi hii ni rasilimali kubwa kwani, mkiitumia vizuri pamoja na rasilimali watu ambayo pia mnayo ya kutosha, naamini kuwa mnaweza kuzalisha chakula cha kujitolesheleza nyie wenyewe kama Jeshi na pia kusaidia majeshi mengine kwa chakula nchini,” alisema Pinda.

Mahitaji ya chakula cha magereza nchini kwa sasa ni wastani wa tani 8,450.5 za mahindi, tani 1,976 za mpunga na tani 1,308.7 za maharage.

Pinda alisema kuwa kwa sasa Jeshi la Magereza nchini linazalisha wastani wa tani 2,051.1 za mahindi ambazo ni sawa na asilimia 24 ya mahitaji, tani 317.7 za mpunga sawa na asilimia 16 na tani 14.7 za maharage ambazo pia ni sawa na asilimia 1.1 ya mahitaji yote.

Alisema kuwa kutokana na Jeshi hilo kuwa na rasilimali kubwa ya ardhi na watu, halipaswi kuendelea kutegemea bajeti ya Serikali kwa mahitaji ya chakula na badala yake umefika wakati wa kujitegemea.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.