Alitoa agizo hilo mjini Tanga wakati akizindua Wiki ya Nenda kwa Usalama Barabarani ikiwa na kaulimbiu ‘Endesha Salama, Okoa Maisha’. Kwa mujibu wa Rais Kikwete asilimia 56 ya ajali za barabarani zinatokana na uzembe na ukosefu wa umakini wa madereva.
Rais Kikwete alisema katika kipindi cha miaka mitano kuanzia mwaka 2010 hadi 2014, watu 19,264 walipoteza maisha kutokana na ajali za barabarani na idadi ya waliokufa katika kipindi cha mwaka huu pekee ni 3,534 sawa na idadi ya wanaopoteza maisha kwa malaria.
Hii maana yake ni kwamba watu wanaopoteza maisha kwa ajali ni kubwa. Kinachosikitisha zaidi ni kuwa ajali hizo zinaepukika endapo madereva au wanaoendesha vyombo vya moto wangekuwa makini.
Kutokana na wimbi hilo la ajali ni wakati muafaka kwa madereva wetu kubadilika. Kuhakikisha wanazingaria sheria na yale yote waliyofundishwa vyuoni. Pia, kuna umuhimu wa vikosi vya usalama barabarani kuongeza kasi ya kuzidhibiti ili kulinda usalama wa wananchi.
Tunaamini kwamba madereva wakizingatia sheria na kuwa makini barabarani kuna uwezekano mkubwa wa kuondokana na ajali.
Kwa mlolongo wa ajali zinazotokea nchini njia pekee ya kuokoa maisha ya Watanzania ni kila abiria kuwa mkali anapoona dereva anaendesha gari ovyo ovyo, lakini pia, askari wa usalama barabarani wanatakiwa kuwa makini katika kudhibiti hali hiyo.
Kwa sababu hiyo madereva ambao hawazingatii sheria ni lazima wawajibishwe kwani tumechoka kushuhudia ajali za mara kwa mara katika nchi yetu. Madereva wasipokuwa makini maisha yetu yataendelea kuwa hatarini.
Ni imani yetu kuwa madereva wataacha kuendesha magari yao kizembe ili kuepusha ajali za aina hiyo kwani zinapunguza nguvu kazi ya taifa bila sababu zozote za msingi. Kuna ulazima wa adhabu kali kutolewa kwa wahusika ili wawe makini barabarani.
0 comments:
Post a Comment