Mabao 3 ya Samata yaivusha Mazembe Afrika.

MSHAMBULIAJI nyota wa Tanzania, Mbwana Samata juzi alifunga mabao matatu kuiwezesha TP Mazembe ya Jamhuri ya Kidemokrasia ya Congo (DRC) kuingia nusu fainali ya Ligi ya Mabingwa Afrika.

TP Mazembe yenye makazi yake Lubumbashi, imesonga mbele pamoja na Al Hilal ya Sudan baada ya michezo iliyokuwa na ushindani katika Kundi A lililomaliza mechi zao juzi. Klabu tatu katika kundi hilo, Mazembe, Hilan na Moghreb Tetouan ya Morocco zilianza mechi hiyo ya mwisho ya makundi zikiwa zimefungana kwa kuwa na pointi nane.

Mabao matatu ya Samata yaliisaidia TP Mazembe kusonga mbele kwa ushindi mnono wa mabao 5-1 dhidi ya Moghreb Tetouan, na Al Hilal ilisonga mbele baada ya sare ya 1-1 dhidi ya Smouha ya Misri. Mabingwa mara nne, Mazembe sasa watacheza na mshindi wa pili wa Kundi B, El Merreikh ya Sudan katika nusu fainali.

Mshindi wa Kundi B, USM Alger ya Algeria itacheza na mshindi wa pili mara mbili, Al Hilal. Ikitumia uwanja wake wa nyumbani mjini Lubumbashi, TP Mazembe ilianza haraka kujichuja katika mechi hiyo ya mwisho dhidi ya Moghreb Tetouan kwa Samata kufunga bao la kwanza katika dakika ya 12.

Rainford Kalaba aliongeza bao jingine katika dakika ya 30, huku Samata akifunga la kwake la pili dakika ya 53. Mchezaji kutoka Ivory Coast, Roger Assale alifanya matokeo yawe 4-0 kwa TP Mazembe zikiwa zimebaki dakika mbili pambano kumalizika, kabla ya Samata kufunga bao lake la tatu katika dakika ya 90.

Licha ya kipigo hicho kikubwa, Moghreb Tetouan ingeweza kusonga mbele kama Al Hilal ingepoteza mechi yake ugenini kwa Smouha nchini Misri. Kufikia mapumziko, Moghreb ilikuwa bado ina nafasi kwa sababu Al Hilal ilikuwa nyuma kwa bao 1-0 baada ya Smouha kupata bao la kuongoza lililofungwa na Amr El Menoufy katika dakika ya 21.

Lakini Hilal ilipigana kiume na kusawazisha katika dakika ya 73 kwa bao la Nasreldin Al Shigail kuivusha katika nne bora. Wakati Kundi A likimaliza kwa mchuano mkali, Kundi B lilimaliza kazi yake hata kabla ya kumalizika kwa mechi zao za Ijumaa, ambako USM Alger ilipoteza mechi yake ya kwanza.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.