Tume yakemea vurugu,matusi kwenye kampeni.

TUME ya Haki za Binadamu na Utawala Bora (THBUB) imekemea vurugu na mauaji yaliyotokea wakati wa mikutano ya kampeni za vyama vya siasa inayoendelea katika sehemu mbalimbali nchini.

Tume hiyo pia imesema inasikitishwa na lugha zinazotumiwa na baadhi ya wagombea ambazo ndizo zimekuwa chanzo cha uchochezi na uvunjifu wa amani wakati wa kampeni za urais, wabunge na madiwani zinazoendelea.

Kwa mujibu wa taarifa iliyotolewa na tume hiyo na kusainiwa na Mwenyekiti wake, Bahame Nyanduga,Tume yake ilipokea taarifa ya vurugu kutoka katika vyombo vya habari kuhusu uvunjifu wa amani katika baadhi ya maeneo hapa nchini.

Aidha, taarifa hiyo ilisema tume inasikitishwa kuona kampeni za uchaguzi zilianza vizuri katika hatua za mwanzo za uzinduzi lakini sasa hivi zinaingia dosari kitu ambacho ni kinyume na ni ukiukwaji wa haki za binadamu.

Taarifa hiyo ilisema kuwa kwa sasa kuna ongezeko kubwa la vurugu zinazotokea kutokana na wafuasi wa vyama vya siasa kuingiliana katika mikutano ya kampeni ya vyama vingine na kusababisha vurugu, ama wafuasi hao kupigana.

Taarifa iliongeza kuwa vurugu za hivi karibuni zimesababisha kifo cha mtu mmoja na watu wengine kujeruhiwa kwa kukatwa mapanga, pamoja na kuharibiwa kwa gari la mgombea ubunge wa jimbo la Tarime Mjini, Esther Matiko katika vurugu za vyama vya CCM na Chadema zilitokea kijiji cha Mangucha, jimbo la Tarime Vijijini, Septemba 10, 2015.

Aidha, taarifa hiyo ilisema kuwa tume inasikitishwa na taarifa ya vurugu zilizofanyika hivi karibuni wakati wa kampeni zilizofanyika katika baadhi ya maeneo hapa nchini ikiwemo majimbo ya uchaguzi ya Kyela, Bunda mjini, Dodoma mjini, Dar es Salaam na Zanzibar.

Matukio haya yote yanaelezwa kukiuka haki za binadamu na utawala bora pamoja na kwenda kinyume na Maadili ya Uchaguzi wa Rais, Wabunge na Madiwani ya Mwaka 2015 yaliyotiwa saini na vyama vya siasa.

Katika maadili ya uchaguzi ya mwaka 2015, vyama vya siasa na wahusika wake vinatakiwa kukataa na kulaani vitendo vya vurugu, fujo, chuki, mafarakano, matumizi ya lugha za matusi na kejeli na kubeba silaha yoyote inayoweza kumdhuru mtu wakati wa kampeni.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.