Hongera Waziri wangu Majaliwa fanya kazi kwa weledi watanzania wanamatumaini nawe.

Mbunge wa Ruangwa (CCM), Kassim Majaliwa, jana aliingia kwenye vitabu ya kihistoria baada ya kuteuliwa kuwa Waziri Mkuu mpya wa Jamhuri ya Muungano wa Tanzania kwa Serikali ya Awamu ya Tano.

Majaliwa anakuwa Mtanzania wa 11 kuteuliwa kushika wadhifa huo baada ya hayati Baba wa Taifa, Mwalimu Julius Nyerere, hayati Rashid Kawawa, hayati Edward Sokoine, Cleopa Msuya, Salim Ahmed Salim, Joseph Warioba, John Malecela, Frederick Sumaye, Edward Lowassa na Mizengo Pinda.

Tunampongeza Majaliwa kwa kuteuliwa kushika wadhifa huo ambao ni nafasi kubwa katika shughuli za utendaji wa serikali. Waziri Mkuu ndiyo kioo cha serikali kutokana na ukweli kuwa ndiye anayetoa picha ya dhamira ya utendaji wa serikali katika maendeleo ya nchi na pia ndiye kiongozi wa shughuli za serikali bungeni.

Kitendo cha Majaliwa kuteuliwa kushika nafasi hiyo kunadhihirisha jinsi Rais Dk. John Magufuli, alivyo na imani naye katika kutekeleza ile kauli mbiu yake ya `Hapa kazi tu’.

Rais Magufuli alifanya ziara nchi nzima wakati akipiga kampeni ya kusaka urais, kwa hiyo ni wazi anaelewa changamoto iliyo mbele yake katika kutekeleza ahadi zake na ndiyo maana alikuwa anahitaji msaidizi mchapa kazi.

Majaliwa siyo mgeni katika utendaji wa shughuli za serikali, kwani alikuwa Naibu Waziri katika Ofisi ya Waziri Mkuu (Tawala za Mikoa na Serikali za Mitaa -Tamisemi).

Tamisemi ni taasisi muhimu katika utendaji wa serikali kwani ndiyo yenye jukumu la kusukuma ajenda ya maendeleo kwa wananchi.

Kwa hiyo, ni wazi Majaliwa anafahamu hilo kutokana na kufanya kazi hiyo kwa miaka mitano kuanzia 2010 hadi 2015.

Watanzania wanataka mabadiliko na hilo linajidhihirisha na jinsi walivyokuwa makini na uchaguzi wa mwaka huu na hata kwa mara ya kwanza katika historia, tumeshuhudia vyama vya upinzani vikizoa kura nyingi na hata kupata wabunge wengi. Bila shaka Waziri Mkuu mpya, Majaliwa analielewa vizuri suala hilo na ndiyo maana itabidi awe makini na kutekeleza kazi zake kwa weledi huku akizingatia maslahi mapana ya taifa.

Ni kutokana na hilo, ndiyo maana tunamuomba Majaliwa awe kiongozi wa wote, msikivu hata kwa upande wa upinzani. Watanzania wanataka serikali ichape kazi ili kuinua maisha yao kutokana na kuchoshwa na maisha duni huku wakishuhudia mataifa mengine yakipiga hatua kubwa za kimaendeleo. Wakati huduma za kijamii kama afya na elimu zikiwa taabani, lakini wanasikia viongozi wao wanasafiri na kujilipa mamilioni ya posho, ufisadi za fedha za umma na rushwa ya kiwango kikubwa.

Suala hilo lilimsononesha hata Katibu Mkuu wa Chama Cha Mapinduzi (CCM), Abdulrahman Kinana, ambaye alifikia hatua ya kuwaita baadhi ya mawaziri kuwa mizigo.

Kinana alifikia hatua ya kuwashtaki baadhi ya mawaziri kwenye vikao vya Kamati Kuu ya CCM kutokana na kushindwa kutimiza wajibu wao.

Sasa hatutegemei chini ya Rais Magufuli na Waziri Mkuu mpya, yatokee malalamiko ya kuwapo kwa mawaziri mizigo kwani kimsingi itakuwa ngumu kutekeleza ajenda yao ya kuwaletea Watanzania maendeleo.

Tunamtakia Majaliwa kila la kheri katika utekelezaji wa majukumu yake mapya na tuna imani atamsaidia Rais kuibadili Tanzania kuwa sehemu nzuri ya kuishi.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.