Madereva wa Daladala Mkoani Morogoro wamegoma kwa zaidi ya saa 9 wakishinikiza Mamlaka ya udhibiti wa Majini na nchi kavu SUMATRA kuacha vitendo vya kuwanyanyasa hali iliyo sababisha shughuli za kiuchumi kusimama na wananchi kupaza sauti zao.
Baadhi ya wakazi wa Mkoa huo wamesema kuwa mgomo huo umewaathiri pakubwa na kushindwa kufanya shughuli zao za siku na kusema kuwa mvutano huo na SUMATRA inabidi uishe mara moja kwani wanapata shida baada ya kusitisha huduma ya usafiri na kupelekea usumbufu mkubwa huku wanafunzi nao wakionekana kurandaranda mitaani na maeneo jirani ya Morogoro baada ya kukosa usafiri uliosababishwa na mgomo huo.
Mgomo huo sasa umewalazimu wanafunzi na abiria waliokuwa wanaelekea kufanya mahitaji mbalimbali katika mkoa huo na wengine kuelekea kazini kulazimika kutembea kwa miguu na wengine kupanda magari ya mizigo ili kuwahi waendapo na kusababisha usumbufu mkubwa kwa siku hii ya leo.
Wakizungumza na Tambarare Halisi baadhi ya abiria pamoja na wanafunzi walioathirika na mgomo huo uliochukua saa tisa wameitupia lawama serikali kwa kushindwa kushughulikia matatizo ya Madereva hao mpaka kufikia hatua ya kugoma na kuathiri shughuli mbalimbali za kimaendeleo mkoani humo.
Baadhi ya viongozi wa Chama cha Madereva Mkoani morogoro wameelezea sababu za mgomo huo kwakina nakusema kuwa hadi kufikia hatua hiyo nikutokana na utendaji mbovu wa Afisa mfawidhi wa SUMATRA Mkoa wa morogoro kukamata hovyo daladala na kisha kuwatoza faini bila sababu za msingi hali ambayo inawafanya wao wajione hawana haki yeyote.
Mara baada ya mgomo huo wa Madereva kufukuta kwa Saa 9 ilimlazimu Mkuu wa wilaya ya Morogoro Bwana.Muhingo Rweyemamu kukutana na Madereva hao ambapo amesema kamati ya ulinzi na usalama ya wilaya inawaomba warudishe magari Barabarani kwaajili ya kutoa huduma ya usafiri kwa wananchi mpaka siku ya juma tatu watakapokutana tena kutatua kero zinazowakabili.
0 comments:
Post a Comment