TEMESA sasa ni jipu linalohitaji kutumbuliwa.

WAJUMBE wa Mkutano Mkuu wa Jumuiya ya ALAT wamesema wakala wa Ufundi na Umeme (Tamesa) ni jipu linalohitaji kutumbuliwa.

Walitoa hoja hizo mbele ya Naibu Waziri Ofisi ya Rais, Tamisemi, Suleiman Jafo wakati wakichangia hoja kwenye mkutano mkuu wa ALAT.

Wajumbe hao waliomba serikali kuangalia muundo wa utendaji wa Tamesa kwani umejaa mizengwe mingi huku wakiwa hawana wataalamu katika suala zima la utengenezaji wa magari.

Mmoja wa wajumbe alisema kuna maelekezo magari yote ya halmashauri kutengenezwa na Tamesa lakini yakienda huko hakuna mafundi bali wanawapa watu wengine watengeneze na gharama zinakuwa kubwa mara mbili.

Naibu Waziri alisema anaichukua hoja hiyo kuifanyia kazi na atakwenda kuangalia ni nini kinatokea. Alisema pamoja na nia njema, lakini kutokana na wajumbe wengi kugusia suala hilo inaonesha wazi kuwa utekelezaji hauko sawa na hivyo ni lazima kuangalia kuna tatizo gani.

Jafo alisema serikali itatoa mafunzo kwa madiwani kwa kushirikiana na Chuo cha Serikali za Mitaa Hombolo na Uongozi Institute kuhakikisha madiwani wanapata mafunzo ya kuweza kusimamia vyema miradi ya wananchi na maendeleo yao.

Pia alisema Serikali ya Awamu ya Tano imejielekeza kuhakikisha sekta za umma zinapata ushirikiano wa kutosha kutoka sekta binafsi ili kuhakikisha wananchi wanapata huduma bora.

Aidha alisema nchi haiwezi kujengwa bila kuwa na ushirikiano na sekta binafsi na kuwataka wakurugenzi kutenga maeneo ya uwekezaji wakati huu ambapo ujenzi wa viwanda unasisitizwa.

“Kila halmashauri itenge eneo kwa ajili ya uwekezaji kwa kutumia sekta binafsi. Stendi ya mabasi ya Morogoro ni mfano wa kuigwa kwani walitumia wadau kuwekeza na kuna aina ya uwekezaji ikiwamo maeneo ya benki, maduka na baada ya muda itakuwa halmashauri yenye pato la uhakika la ndani,” alisema.

Aliwataka mameya na wenyeviti wa halmashauri kwenda kusimamia ukusanyaji wa mapato kwa njia ya kielektroniki kuwe na ufanisi. Aliwataka wakurugenzi wasikubali kuangushwa na watumishi wa chini. Alisema baadhi ya maeneo, wakuu wa idara wana sauti kuliko wakurugenzi.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.