Watakao bainika kuharibu daraja jipya la Kigamboni waadhibiwe bila chembe ya huruma.

DARAJa jipya la Nyerere lililozinduliwa Dar es Salaam juzi likiwa na urefu wa kilometa 680, limeongeza uwezo wa miundombinu ya usafiri katika jiji hili kongwe hapa nchini. Daraja hili lina jumla ya barabara sita, tatu zikitokea Kigamboni kwenda Kurasini na nyingine tatu kutoka Kurasini kwenda Kigamboni.

Lina uwezo wa kuhimili tani zipatazo 1,300 na limejengwa kwa ubia kati ya Shirika la Hifadhi ya Jamii (NSSF) iliyotoa asilimia 60 ya gharama na Serikali kwa upande wake, asilimia 40. Jumla ya gharama zote ni Sh bilioni 214. Hili ni jasho la Watanzania kwa asilimia 100.

Ni fahari kwa Watanzania kwa kuwa ni daraja la kwanza na la kisasa kujengwa baharini Afrika Mashariki na Kati. Lakini wakati tunajivunia mafanikio hayo, tuna kila sababu ya kuunga mkono angalizo lililotolewa na Rais John Magufuli wakati anazindua rasmi daraja hilo kwa kulibatiza jina la Daraja la Nyerere badala ya jina lake, kwamba Watanzania kwa ujumla wao wanatakiwa kulitunza na kulithamini daraja hilo.

Watakaoharibu miundombinu yake hawaikomoi Serikali bali wanajikomoa wenyewe. Katika jambo hili, Rais hakumung’unya manneno katika hotuba yake na kutamka wazi kabisa kwamba kwa uharibifu wowote wa daraja hilo atakuwa mkali na kuviagiza vyombo vya ulinzi kusimamia jambo hilo bila kufanya ajizi.

Alifafanua kwamba mtu yeyote atakayegonga hata taa tu atozwe faini kubwa ili kujenga heshima ya kulinda mali za umma. Tunapenda kumwunga mkono Rais kwa agizo na angalizo hilo muhimu kwa rasilimali hii ya Watanzania iliyojengwa kwa gharama kubwa na yenye kila aina ya kuleta matumaini mapya kwa jamii ya wana Dar es Salaam na Tanzania kwa ujumla wake kiuchumi.

Sote tushikamane kuilinda rasilimali hii bila kuwaachia wenzetu wachache kuiharibu. Licha ya ukweli kwamba daraja hilo linatarajia kuajiri watanzania 300, faida nyingine ni pamoja na kukuza uchumi, kupunguza tatizo sugu la msongamano wa magari na vyombo vingine vya usafiri na kuondoa tatizo la muda mrefu la usafiri kwa wakazi wa Kigamboni.

Kuzinduliwa kwa daraja hilo, mji wa Kigamboni ambao tayari ni wilaya, kasi ya kuujenga kuwa mji wa kisasa kulingana na mipango miji ya jiji la Dar es Salaam itaongezeka. Faida za Daraja la Nyerere ziko nyingi na fursa nazo ziko nyingi pia hivyo kama Watanzania tuna kila sababu ya kufanya kila liwezekanalo kulitunza daraja hilo.

Tusikubali uzembe wa aina yoyote. Atakayeharibu chochote achukuliwe hatua kwa kupewa adhabu inayostahili ili kuwa funzo kwa wengine. Hili linawezekana cha msingi ni kushikamana dhidi ya waharibifu wote.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.