YANGA yajisogeza jirani na ubingwa wa Ligi Kuu Tanzania Bara

YANGA imejisogeza jirani na ubingwa wa Ligi Kuu Tanzania Bara baada ya kuifunga Toto Africans mabao 2-1 Uwanja wa CCM, Kirumba Mwanza. Ushindi huo umeiwezesha timu hiyo kufikisha pointi 65 katika msimamo wa Ligi Kuu Tanzania Bara baada ya kucheza mechi 26, ikifuatiwa na Azam yenye pointi 58 na Simba yenye pointi 57.
Hata hivyo Simba na Azam zimezidiwa mechi moja na Yanga na zinachuana leo zenyewe Uwanja wa Taifa, Dar es Salaam. Toto Africans ilikuwa ya kwanza kupata bao dakika ya 39 mfungaji akiwa William Kimanzi, akiunganisha krosi ya Abdallah Seseme.
Timu hizo zilishambuliana kwa zamu, lakini umaliziaji haukuwa mzuri, huku washambuliaji Donald Ngoma, Amis Tambwe na Deus Kaseke wa Yanga wakipoteza nafasi nyingi. Nao wachezaji wa Toto Africans wakiongozwa na Seseme na Kimanzi nao walikaribia lango la Yanga, lakini walipiga mashuti dhaifu ama kushindwa kulenga lango.
Yanga ambayo mchezo wake uliopita dhidi ya Mgambo Shooting, ambao pia ilianza kufungwa bao kabla ya kusawazisha na kuibuka na ushindi kama wa jana, ilisawazisha bao dakika ya 50 mfungaji akiwa Kaseke kutokana na pasi ya Tambwe.
Dakika ya 76 Yanga ilipachika bao la pili mfungaji akiwa Juma Abdul aliyemalizia mpira wa Simon Msuva na kuibua shangwe kwa mashabiki wa Yanga. Yanga; Deo Munishi ‘Dida’, Juma Abdul, Oscar Joshua, Kelvin Yondan, Vincent Bossou, Haruna Niyonzima/Thabani Kamusoko, Salum Telela, Simon Msuva, Amissi Tambwe/Malimi Busungu, Donald Ngoma na Deus Kaseke/Matheo Anthony.
Toto Africans; Mussa Mohamed, Eric Muliro, Hassan Khatibu, Salum Chukwu, Carlos Protus, Jamal Soud, Abdallah Seseme, Waziri Junior, William Kimanzi na Edward Christopher. Wakati huohuo Mwandishi Wetu anaripoti kutoka Tanga kuwa Coastal Union jana ilijisogeza karibu zaidi na shimo la kushuka daraja baada ya kukubali kipigo cha bao 1-0 kutoka kwa African Sports.
Bao hilo pekee lilifungwa na Mohammed Mtindi, ambapo limeiacha Coastal ikishika nafasi ya 16 kati ya timu 16 zinazoshiriki ligi hiyo ikiwa na pointi 22, wakati African Sports ikichupa kutoka nafasi ya 15 hadi ya 13 ikiwa na pointi 25.
Timu zote hizo zimebakisha mechi mbili kumaliza ligi. Coastal Union ili ibaki Ligi Kuu inaziombea mabaya timu za African Sports, Mgambo, JKT Ruvu na Kagera Sugar ambazo zina pointi chini ya 26 zifanye vibaya na yenyewe ishinde mechi zake mbili zilizosalia na kufikisha pointi 28.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.